Joan den ostiralean, goizez, 18 urteko A.M.J. eta 15 urteko adingabeko bat atxilotu zituen Erandion Ertzaintzak, besteak beste, Sopelako gasolindegi, Erandioko ostalaritza establezimendu eta Plentziako banketxe batean izan diren atrakuetan nahasita daudelakoan. Aurreko astean, 19 urteko M.S.G. eta I.S.J. eta adingabeko bat ere atxilotu zituzten, Sestaon eta Bilboko Zorrotza auzoan. Gainera, Eusko Jaurlaritzako Herrizaingo Sailaren arabera, taldeko beste bi kide identifikatu zituzten orduan. Identifikazio horien bidez, bietako bat urtarrilaren 23an beste delitu batzuengatik Martutenen (Donostia) espetxeratu zuten, eta bestea adingabeen babeserako zentro batean zegoela jakin zuten, polizia iturriek diotenez. Ikerketa zabalik dago oraindik ere eta atxiloketa gehiago egon daitezkeela ohartarazi du Herrizaingo Sailak.
Guztiei azken hilabeteotan Bizkaiko hainbat gasolindegietan egin diren hamar bat atrakuren egileak izatea leporatzen diete; Santurtzi, Zamudio, Trapagaran, Sopela eta Bilbon, besteak beste. Azken bi horietan pistola bat baliatuz egin zuten lapurreta. Horretaz gain, indarkeriaz egindako zenbait lapurreta egotzi dizkiete. Horien artean, Erandioko ostalaritza establezimendu batean iragan urtarrilean izandako atrakua eta Zorrotzako (Bilbo) saltoki batean larderia erabiliz egindako hiru lapurretak nabarmendu ditu Herrizaingo Sailak. Otsailaren bukaera aldean Plentziako banketxe bat indarra erabiliz lapurtu zutela diote polizia iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun