Joseba Arregi Hirigintza zinegotziak azaldu duenez, Errekaganeko proiektua abiaraztean, "hainbat jarduketa" hasiko ditu Udalak "epe laburrean" Itzubaltzeta / Romoko "herritarren hiri-bizitzaren kalitatean hobekuntza nabarmena ekarriko dutenak”. Izan ere, Gobela ibaiaren paretik doan Errekagane kaleko lanen bidez hainbat helburu bete nahi ditu Udal Gobernu taldeak, bertako parkea berrantolatu, bidegorri bat egin, eta oinezkoentzako pasabidea zaharberritu, eta Ezekiel Agirre kaleko zubia gurutzatu ondoren dagoen parkearekiko lotura barne. Hobekuntza horrekin egungo pasabidea zabaldu nahi dute eta aldi berean, aipatu bezala, bizikletetarako bidea egokitu ere. Ezequiel Agirre kaleko beste aldean dagoen plazari dagokionez, egun dagoen mendixka txikia kendu egingo da, azalera hori zolatzeko eta horrela irisgarritasuna errazteko.
Imanol Landak egitasmoak duen garrantzia nabarmendu du, “inguru horretako egungo egoera ez delako ona". Horregatik, aurreikusitako ekintzak Itzubaltzeta / Romoko eta Areetako auzokideek "ondo hartuko dituztelakoan nago, gune horretatik jende ugari ibiltzen delako”.
Errekagane kalean aurrera eramango dituzten lanen aurrekontua 1.120.000 eurokoa izango da. Han espaloia zabalduko dute eta ezintasunak dituzten pertsonentzat aparkatzeko tokiak ipiniko dituzte; kable elektrikoak kenduko dituzte; hiri hornigarri berriak jarriko dituzte eta oinezkoari lehentasuna emateko oinezkoentzako pasabideak era ezberdinean zolatuko dituzte.
Errekagane parkeari dagokionez, inguru horretako urbanizazio proiektuaren zenbatekoa 529.000 eurokoa izango da eta helburua parkea oinezkoentzako bideen bitartez berrantolatzea da. Oinezkoen bidearen zoladura berrituko da, zabalera handiago emanez eta bidegorri bat egokituko da. Lanak egiteko epea lau hilabetekoa da, baina ez dute baztertzen lehenago amaitu ahal izatea.
Itzubaltzetako Luis Lopez Oses errepideko zati bat moztu dute Errekaganeko herri lanengatik
Getxoko Udalak gaur goizean ekin dizkio Itzubaltzeta / Romoko Errekagane kaleko azpiegiturak berritzeko obrei eta horren ondorioz Luis Lopez Oses kalean ibilgailuen trafikoa moztu dute, Gobela kiroldegitik Errekagane kalera bitarteko gunean. Kale itxiera lau astez luzatuko da, gutxi gorabehera. Epe hau, baina, aldatu egin daiteke lanen bilakaeraren arabera. Izan ere, Obra hainbat fasetan banatu da, eta aurreneko fasea Luis Lopez Oses eta Serantes kaleen artekoa da. Luis Lopez Oses kalean euri-urak husteko hoditeria ezarriko da eta oinezkoen ibilbideak diren espaloiak zabalduko dira, autoak uzteko lekua murriztuz. Gainera, galtzadaren zoruaren ezaugarriak ere, egun oso hondatuta daudenak, hobetuko dira. Hori guztia, 1.650.000 euroko aurrekontua duen Errekagane kalea eta parkea hobetzeko zein bidegorria jartzeko plangintzaren barruan egingo dute. Era berean, Zubieta eta Lope de Vega kaleen artea ere saneamenduko sarea hobetuko dute. Azken proiektu horrek 893.254 euroko inbertsioa egitera behartuko du. Argazkian, egun airetik doazen kable elektrikoak kenduko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun