Unai Basurko itsas-gizon portugaletearra eta Eunate Agirre bodyboarder sopeloztarrak (argazkian) irabazi dute 2007ko Kirolari Onenaren Euskadi Saria. Hain zuzen ere, gaur jasoko dute garaikurra, 19:30ean Lehendakaritzaren Gasteizko egoitzan egingo den ekitaldian. Basurkoz eta Agirrez gain, ondokoak izan dira sarituak aurtengo edizioan: Josetxo Elkoro (Kirolaren Sustapena, Prestakuntza eta Dedikazioa); Aritz Aranburu eta Iker eta Eneko Pou anaiak (Kirolean Euskaltasuna Zabaltzea); Agustin Zulueta eta Iberdrola (Kirola Garatzeko Egindako Lan Zientifikoa edo Teknikoa); Bera Bera eskubaloi taldea (Kirol Erakundea); Akaba S.A. (Enpresa Babesleak Egindako Lana); eta Euskal Herriko Unibertsitatea (Emakumeen eta Gizonen arteko Berdintasuna).
Euskadi Kirol Sariak eragile, bultzatzaile eta akuilu izatea dute bokazio, Eusko Jaurlaritzaren Kirol Zuzendaritzak adierazitakoaren arabera. Helburu nagusia, berriz, kirol alor zabalean kalitatea eta eredugarritasuna bultzatzea, euskal kirolarentzat ez ezik, gizarte osoarentzat ere eredu diren jarduerak nabarmenaraziz eta kalitatezko erreferentzia bihurtzen lagunduz. Hain zuzen ere helburu nagusi horien argitan eta oinarrietan zehaztutako irizpideei jarraiki egin du epaimahaiak lana eta hartu ditu erabakiak. Erabakiak hartzea ez dela erraza izan adierazi dute, "kirola Euskadin indar handia duen errealitatea baita, aberatsa eta anitza". Epaimahaia honako hauek osatu dute: Iñaki Sagastume (Gipuzkoako Kirol Prentsa Elkartea), Eduardo Castañeda (Bizkaiko Kirol Prentsa Elkartea), Alberto Aranburu (Arabako Kirol Prentsa Elkartea), Rafa Munilla (Euskal Kirol Federazioen Batasuna), Maria Tato (abokatua kirol gaietan aditua), Jose Ramon Garai (Eusko Jaurlaritzako Kirol zuzendaria) eta Elisabet Altube (Epaimahaiaren idazkaria baina hautespiderik gabea).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun