Maiatzaren 9ra bitartean, Fekoor (Gutxitasun Fisikoa duten Pertsonen Bizkaiko Federazio Koordinatzailea) elkarteko tailerretan esku hartzen duten 17 ikasleen taldekako erakusketa ikusteko aukera egongo da Sopelako udal aretoan. Bilduma horretan, Amaia Larrinaga irakasleak gidatuta, urtean zehar, artistek sortu dituzten hamar pintura eta zazpi zeramika ikusi ahal izango dira. Obra bakoitzak bere estilo eta gai pertsonala erakusten du, tokiko iturriek adierazi dutenez. Buztinezko artelanen artean, lorontziak, markoak, zintzilikarioak, hautsontziak, jolasak, ontziak eta apaingarriak daude, besteak beste. Pinturari dagokionez, teknika ezberdinak erabili dituzte, oliotik, ziritxora, akrilikotik ikatz-marrazkietara, teknika mistoa ahaztu gabe. Argazkian, erakusketako hainbat lan.
Taldea bere artelanak bezain anitza da. 21 eta 70 urte arteko gizon-emakumeak batzartzen dira astelehenero, norberak dituen maina eta ahalmenak eskaintzeko asmoz. “Giro ederra sortzen da egunero taldekideen artean. Adiskidetasuna eta elkar ulertzea beti daude bileran”, azaldu du Amaia Larrinagak. Bi espezialitate hauez gain, bestelako lanbide tailerrak eskaintzen ditu Fekoorrek: larrua, saskigintza, eskulanak eta maila desberdinetako informatika ikastaroak. Hori guztia, heziketa eta ikasketak ezezik, harreman eta autonomia pertsonalari buruzko ohitura sozialak lortzeko ere bai. Horrela, baliabide sozialak modu normalizatuagoan erabili eta gizartean parte-hartze aktiboa izatea erraztu nahi du ekimenak. 17 elkartek osatzen dute Gutxitasun Fisikoa duten Pertsonen Bizkaiko Federazio Koordinatzailea. Beraien helburu nagusiak bizi-kalitatea hobetzea eta aukera berdintasuna bermatzea dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun