Gorka Oribe eta Juan Bautista Galdiz "Batxi" (argazkian, ezkerretik eskuinera) gazte algortarrei 20.000 euroko fidantza jarri dizkietela jakinarazi du Uribe Kostako Amnistiaren Aldeko Mugimenduak, Etengabe bitakoraren bitartez. Hartara, hori ordainduta, bihar kaleratuko direla espero da. Algortan, Getxon eta Berangon urriaren 17an izan zen polizia operazioaren harira, Baltasar Garzon epailearen aurrean aurkeztu ondoren kartzelaratu zituzten biak azaroaren 22an eta, ordutik, Soto del Realgo (Madril) espetxean izan dituzte gatibu. "Algortara iristean lehen harrera egingo zaie Amnistia tabernan. Ordua bihar zehaztuko dugu", aurreratu du errepresioaren aurkako erakundeak. "Kalera irtetea pozgarria bada ere", ordaindu beharreko fidantzak, isunak… "txantaia ekonomikoa" ere badirela salatu du AAMk. Aipatu polizia operazioaren ondorioz, oraindik, Lander Labajo, Aner Mimenza, Mikel de Gregorio "Degre" eta Joseba Elorriaga gazteek jarraitzen dute preso.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun