"Isaias Carrascok ez bezala" 33/01eko auzipetuek "helegitea aurkezteko aukera" badutela adierazi du Getxoko alkateak
Espainiako Auzitegi Nazionalean epaituak izaten ari diren 27 euskal herritarrei eta, bereziki, Mitxel Sarasketa eta Jagoba Terronesi elkartasuna adierazteko galdegin dio, gaurko osoko bilkuran, Getxoko Udalbatzari, Eusko Abertzale Ekintzak. Imanol Landa EAJko alkateak, baina, eurek "eskubide urraketa guztiak" salatzen dituztela adieraztearekin batera, 33/01eko auziperatuek "helegitea aurkezteko edo Europara jotzeko aukera" badutela erantzun dio Mari Espe Fuertes ekintzaileen bozeramaileari. "Zer aukera izan zuen ETAk hildako Isaias Carrasco PSE-EEko zinegotzi ohi arrasatearrak? Alde horretatik ez dugu ezertxo ere entzun zuon ahoetatik", aurpegiratu dio ondoren. Bitartean, mobilizazio eguna deitua du ostiral honetarako, apirilak 25, Amnistiaren Aldeko Mugimenduak. Besteak beste, Itzubaltzeta / Romoko Kolas plazan, 19:30ean, eta Algortako Telletxen, Leioako Boulevardean eta Plentziako Pirulin 20:00etan jarri dute ordua. Argazkian, Mari Espe Fuertes Getxoko EAEko bozeramailea gaurko udal batzarrean.
Telletxe plazan elkarretaratzea egin eta 20:30ean abiatuko den manifestazioaren ostean, taloak egingo dituzte bihar Algortako Amnistia tabernan. Sopelan, berriz, amnistiaren aldeko bertso afaria egingo dute, 22:00etatik aurrera, Arkaitz Estiballes eta Fredi Paya bertsolariekin. Azkenik, Presoen Aldeko Taldeek (PAT) biharko mobilizaziotan parte hartzera deitu eta hilaren 30ean jarri du hitzordua, hilabeteko azken asteazkenarekin bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun