Etxean dira Batxi Galdiz eta Gorka Oribe
2008ko api. 25a, 12:25
Jarritako 20.000 euroko fidantza ordainduta, 20:00ak inguruan atera ziren atzo Soto del Realgo (Madril) espetxetik Juan Bautista Galdiz "Batxi" eta Gorka Oribe gazte algortarrak. Kartzela aurrean zeuzkaten etxeko eta lagunekin bildu, zerbait hartu eta ziztu bizian abiatu ziren Euskal Herrira. Gauerdiko 12:30ak aldera Algortara heldu zirenerako, dozenaka herritar zain zituzten Amnistia tabernan. Besarkada eta alaitasun malkoak lehendabizi, loreak, agurra eta bertsoak ondoren, han bildutakoei eskerrak eman zizkieten, hitza hartu bezain laster, Galdizek eta Oribek. Hala ere, espetxe barruan geratu direnak ez zituzten ahaztu nahi izan gazteek eta "etxean behar ditugula" aldarrikatu zuten. Kabarekin topa egin ostean, taberna barruan, hormatik kendu zituzten euren argazkiak biek. Oraindik, Uribe Kostako Amnistiaren Aldeko Mugimenduak ez du zehaztu ongi etorri ekitaldia noiz egingo dieten.Algortan, Getxon eta Berangon urriaren 17an izan zen polizia operazioaren harira, Baltasar Garzon epailearen aurrean aurkeztu ondoren kartzelaratu zituzten kartzelaratu zituzten biak azaroaren 22an eta, ordutik, Soto del Realgo (Madril) espetxean izan dituzte gatibu. Aipatu polizia operazioaren ondorioz, oraindik, Lander Labajo, Aner Mimenza, Mikel de Gregorio "Degre" eta Joseba Elorriaga gazteek jarraitzen dute preso.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun