Leioaztarrak 15 egunetan artatzeagatik gizarte zerbitzuez harro agertu da Udala
Leioako Gizartekintza Sailak "bere zerbitzuak hobetzen jarraitzen duela" eta lehen harrerarako epea 15 egun baino gutxiagotan ematea lehen aldiz lortu duela adierazi du harro Isabel Garcia Ezker Batuko zinegotziak. Emaitza hori posible izateko "lan gogorra" egin izan da joan den urtean gizarte langile bat eta administrari laguntzaile bat gehituz, zerbitzua indartuz, espedienteak aztertuz, harrera sistema zentralizatuz, "laguntza behar ez zutenak" zerrendatik kenduz... eta aurten, behingoz lehen fruituak ematen hasi da lana. Gizartekintza Saileko arduraduna den Isabel García zinegotzia baieztatu duenez, 2008ko lau hilabeteetan nabarmen hobetu dira harreraren gaineko datuak. Urtarriletik apirilaren hasierara 162 pertsona hartu zituzten, egunean sei lagun bataz besteko, hori dela eta lehen harrera egiteko 15 egun baino gehiago itxaroterik ez dute izan zerbitzuko erabiltzaileek. Lehenengo harreran, datu bilketa egiten dute harreragunekoek eta erabiltzailea orientatu eta informatzeaz gain, segimendua egingo duen jendarte langilearengana bideratzen dute laguntza behar duten leioaztarrak. Prozesu horretan "hainbat ordu" ematen dituzte.
Leioako Gizarte Zerbitzuen lehen harrera zerbitzua astelehen eta asteazkenetan dago zabalik 9:30etik 13:15era, nahiz eta Aste Santuan ostegunean ere irekita mantendu zuten. Zerbitzutik adierazi dutenez "egoera berezia izan da, epeak ez luzatzeko ostegunean irekitzea erabaki genuen". Garciak adierazi bezala, "erabiltzailea laguntza ekonomikoren bat jasotzeko aukera duela ikusten badugu segidan honi buruzko informazio guztia ematen diogu, denbora gehiagorik ez galtzeko eta prozesua arintzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun