Getxoko udal liburutegi eta kiroldegietan ere erabili ahal izango da osasun txartel elektronikoa
2008ko api. 28a, 20:22
"Administrazio elektronikoa bultzatzeko asmoz", Getxoko Udala Eusko Jaurlaritzarekin batera ari da lanean, osasun txartel elektronikoa (ONA izenez ezaguna) getxoztar guztien artean banatzeko aurten. Horren bidez, etxetik mugitu gabe egin ahal izango da Udalaren, Aldundiaren, Eusko Jaurlaritzaren eta beste administrazio batzuen hainbat gestio, tokiko iturriek azaldu dutenez. Dagoeneko, gaur egun, zerbitzu jakin batzuk izapidetu daitezke: foru ogasunean Pertsona Fisikoen Errentaren gaineko Zergaren (PFEZ) aitorpena, medikuarenera joateko txanda, medikua aldatzeko eskabideak, gidabaimenaren puntuen kontsulta edo laneko biziaren kontsulta (Gizarte Segurantzari kotizatutakoa), besteak beste. Hori gora behera, Udalak pixkanaka beste zerbitzu berri batzuk ere erantziko dizkio txartelari: erroldatzeko agiriak egin ahal izatea, sarrera-erregistroak, ordaindu gabe dauden zorren ordainketa, lizentzien eskabideak eta kontsultak… ONA txartelaren bidez, administrazioekin izapideak online egiteko aukera izango da eta, udalerrian bertan, jasotzen den egunetik erabili ahal izango da txartel hori liburutegietako bazkide-txartelaren ordez. Getxo Kiroletako bazkideek udal kiroldegietako instalazioetara sartzeko ere erabili ahal izango dute.“Sistema honi esker, herritar guztiek edukiko dute kudeaketak administrazio bulegoetara joan beharrik izan gabe egiteko aukera –azpimarratu du Getxoko alkate Imanol Landak–. Azken finean, Udala teknologia berrietara sartzeko urrats garrantzitsua dugu hau eta, ondorioz, udalerriko herritarrei zerbitzu hobea eta erosoagoa eskaini ahal izatea ekarriko du”. Landaren esanetan, maiatzaren amaieran bulego tekniko bat sortuko da eta, bertan, Udaleko eta Eusko Jaurlaritzako teknikariek lan egingo dute uda amaitzean hasiko den txartelen banaketa planifikatu eta ikuskatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun