Larrabetzuko irabazlea, Jone, bi ofiziotan sinesgarri aritu zen. Zortziko nagusian Maialen Berekoetxe neska beharginaren hobetu ordaindutako gizonezko lankidearen rola betetzen jakin izan zuen, Maialenek gaia alde batetik bestera eraman arren. Doinu txikian, berriz, bikote ona egin zuen Itxaso Paya surflariarekin eta ontzia itsasotik defendatu behar izan duen marinelaren plantak egin zituen. Bakarkako lanean berriz, egoki erantzun zien puntuei eta egoki ere josi zuen haurtzaroko pala eta baldea topatzen dituen arkitektoaren gaia, baina, arazoren bat ikusi nahi izatekotan, umetako jostailuei abestuz ez zegoen bere ahotsean malenkonia topatzerik.
Saio ona oro har
Larrabetzuko saio bizian, Itxaso Paya egungo Ipar Uribeko txapeldunak ere saio polita egin zuen, batez ere Beñat Vidalekin zortziko nagusian egindako ofizioan. Mailen Berekoetxe, ordea, saioko bertsolaririk irregularrena izan zen eta zortziko nagusian sendo hasi bazen ere, ez zuen jakin gaiari koherentzia ematen. Zortziko txikian ere, nabarmendu gabe bertso on batzuk bota zituen, baina puntuetara heldu zenean azken oinarekin erratu eta lehiatzeari utzi zion.
Alberto de Abajo "Zoro" eta Ekain Landa "Txispain" etxean abesteko presiopean aritu behar izan ziren, bertako gazteriak pankarta eta guzti –"'Zoro' eta 'Txispain', Larrabetzun bikain'– uneoro babestu zituela. Landak teknikoki lan lar ona egin ez arren, bertso eder batzuk bota zituen, Peru Vidalekin egindako ofizioan. Izan ere, erraza izan zuten Larrabetzuko artzainak eta "todoterrenoa" ardiek geldituta duen Peru pilotoak horibaitarren algarak sortzeko. Horiek baina, gainditzeko moduan izan zituzten "Zoro" eta Larrazabalek, gaia aproposa ere izan zutela: bikotea telebista ikusten ari dela, "Zoro" senarra agertzen da iruditan Euskalsexi buruzko erreportajean.
Ipar Uribeko Bertsolari Txapelketaren azken kanporaketa, ordea, Fikako herriko txokoan egingo dute maiatzaren 9an, beste bertso afari bat tartean. Bertan, azken sei bertsolariek jardungo dute: Taketeko Miren Ibarluzea eta Mikel Goiriena, ALBEko Ekaitz Larrazabal "Katxo", Josu Landeta eta Pello Etxebarria "Bonbero" eta Itzubaltzetako Peio Ruiz de Agirre.
Finala, berriz, maiatzaren 17an ospatuko da Areetako Andres Isasi musika eskolan 18:00etan. Eta bertakoek Bizkaiko txapelketarako 30 lagunen zerrendan sartzeko aukera izango dute. Orain arte, Etxahun Lekue larrabetzuarra eta hiru Paya Ruiztarrak –Fredi, Xabi eta Itxaso– izan dira Ipar Uribeko txapelaren jabe, eta Itxasori egokituko zaio 2006an jasotako txapela defendatzea.
Orain arteko sailkapena:
- Jone Uria, 266 puntu.
- Peru Vidal, 258 puntu.
- Itxaso Paya, 256 puntu.
- Olatz Ibarluzea, 252 puntu.
- Arrate Illaro, 251 puntu.
- Miren Loizaga, 246,5 puntu.
- Beñat Vidal, 226 puntu.
- Alberto de Abajo "Zoro", 205,5 puntu.
- Oier Iturralde "Atano", 198,5 puntu.
- Unai Angulo, 185,5 puntu.
- Gabi Basañez, 173 puntu.
- Ekain Landa "Txispain", 169,5 puntu.
- Maialen Berekoetxe, 166,5 puntu.
- Unai Larrazabal, 163 puntu.
Jone Uria bertsolari gaztea nagusitu zen pasa den ostiralean Larrabetzuko Hori Bai gaztetxean jokatu zen Ipar Uribeko VII. Bertsolari Txapelketako bigarren kanporaketan. ALBEkoak ehun bat lagunen aurrean erakutsi zuen bere maila, saio osoan zehar hutsunerik txikiena ere ez zuela izan. Horri esker, 266 puntu batu, Larrabetzuko saioa irabazi eta Sopelan aritutako bertsolari gehienak ia eklipsatu zituen, Areetako finalean sailkatzeko oso bide estua utzi baitie, oraindik Fikan Ekaitz Larrazabal "Katxo" edota Miren Ibarluzea bezalako faboritoak abestu behar dutela. Baina estutasun hori, ez zuen soilik Uriak sortu. Izan ere, Peru Vidal (258 puntu) izan zen Larrabetzuko ezustekorik aipagarriena eta oso saio borobila eta polita egin zuena. Batez ere, aipatzekoak dira erretiroan pentsatzen ari den politikariari buruz egindako bakarkako lana eta Batxi eta Gorka espetxetik kaleratu berriak diren lagunei abestutako agurra. Atzean, Itxaso Paya (256 puntu), Beñat Vidal (226), Alberto de Abajo "Zoro" (205,5), Ekain Landa "Txispain" (169,5), Maialen Berekoetxe (166,5) eta Unai Larrazabal (163) izan ziren Hori Bain. Bestalde, saioaren audioa Larrabetzu.org-ri esker entzun daiteke. Argazkian, Jone Uria saioko irabazlearentzako oroigarriarekin, Sabin Arana historiagilearen eskuetatik jaso ostean. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun