Uribe Kostako Ikasle Abertzaleen oharra:
Apirilak 30ean, denok Algortara!
Lanuztea konbokatu den Uribe Kostako ikastetxeetatik, bizikletada abiatuko da; Algortan Telletxetik hasita eguerdiko ordu batean gauzatuko den manifestaldia helmuga izanik. Bologna eta EAE-ko dekretuaren aurkako protesta amaitu eta Txiki eta Otaegi plazan ekitaldia burutuko da, non ikastetxe bakoitzeko Ikasle Abertzaleetako taldeek egindako borroka eta ikasleriaren arazoen berri emango duten.
Ekitaldiaren ostean, bazkaldu egingo dugu (bakoitzak bere ogitartekoa eraman dezala).
Eta egunari behar bezalako amaiera emateko, ikastetxeen arteko olinpiadak egingo dira.
Bizikletak eta eztarriak prestatu, inposaketen aurrean, entzun gaitzatela!
Uribe Kostako Ikasle Abertzaleak
Uribe Kosta eta Erandioko ikasleek protesta egun garrantzitsua izango dute bihar, asteazkena, hilak 30. Izan ere, aurten Europako Goi Hezkuntza Esparrua osatzeko Bologna Prozesua eta ikasleen eskubideak eta betebeharrak arautu behar dituen Eusko Autonomi Erkidegoaren dekretuaren aurka eramandako borrokari segida emanez, bihar eguerdirako lanuzteak deitu dituzte ikastetxeetan. Hortaz, zentroetako irakasleek agindutakoa ikasi beharrean bizikleta martxa –bizikletadia deitu dutena–, manifestazioa eta ekitaldi politikoa eramango dituzte aurrera. Ikastetxeetatik irtenda, ikasle txirrinduzaleak erritmo lasaian ibili eta Algortan batuko dira, arratsaldeko 1etan, eskualdeko hiriburutik manifestazioa egiteko. Ordu erdi beranduago, berriz, ekitaldi politikoa izango dute Txiki eta Otaegi plazan "non ikastetxe bakoitzeko Ikasle Abertzaleetako taldeek egindako borroka eta ikasleriaren arazoen berri emango duten", eskualdeko IAk jakinarazi duenez. Protestari alde ludikoa jartzeari begira, ekitaldiaren ostean herri bazkaria eta ikastetxeen arteko olinpiadak egingo dituzte. Argazkian, biharko egunerako kartela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun