Ertzainak hainbat epaitegik jasan izan dituzten erasoen inguruan aritu dira eta horiek AAMren jardunarekin nolabaiteko lotura dutela ulertarazi dute. "Adibidez Eibarko epaitegia erasotu baino 4 egun lehenago bertan presoen aldeko pankarta bat itsatsia zegoela adierazi dute. Oiartzunen ere antzeko kasua eman zela azaldu dute", Askatu.org webguneak nabarmendu duenez. Durangoko epaitegiaren aurkako erasoko atestatua egin zuten ertzainek lekuko babestu bezala deklaratzeko eskatu du, AAM "ETAren ingurukoa" dela argudiatuz. Horren harira, azken urteetan Ertzaintzak "erasotutako" presoen aldeko ekimenak "ugariak" izan direla salatu du Askatasunak; baita sakabanaketaren sorreran "EAJk berak" parte hartu zuela ere. "Zentzu honetan, epaiketan erakutsi duten jarrera, azken urteetan egin dutenaren ispilua dela argi gelditu da. Errepresioaren salaketa eta presoekiko elkartasuna ezabatu nahi dute, eta EAJ prest dago helburu honi bere ekarpena egiteko", azaldu du errepresioaren aurkako erakundeak. Alderdi horrek "erantzunkizun argiak" dituela dio Askatasunak, "Ertzaintzak dituen tortura salaketak kasu", eta zentzu horretan "logikoa" ikusten du erakundeak, "beraiek ere AAM paretik kendu nahi izatea".
20 minutu
Atzoko saiak, berriz, 20 minutu baino ez zituen iraun. Besteak beste, Askatasunak eta Amnistiaren Aldeko Batzordeek egitura bat dutela, nazionala, herrialdekoa eta herrietakoa, azaldu eta erakundeok dirua txosnetatik edo boletoak salduz ateratzen dutela gehitu zuten fiskalaren lekuko bezala deklaratu zuten 4 guardia zibilek. Hori entzunda, "zirkutzat" jo zuen epaiketa Askatasunak. "Nork ez daki Euskal Herrian errepresioaren ondorioei aurre egiteko dirua herritarren elkartasunetik ateratzen duela Amnistiaren Aldeko Mugimenduak? Hainbeste jende mugitzen duen zein erakundek ez dauka egitura bat?", adierazi zuen errepresioaren kontrako erakundeak.
Hileko azken asteazkenetan egin ohi diren elkarretaratzeekin bat eginez, hainbat ikasle, irakasle eta langile batu dira EHUko campus eta fakultateetan, Etxerat, Askatasuna, Senideak, Amnistiaren Aldeko Batzordeak edo Euskal Herriko Giza Eskubideen Behatokia erakundeetan lan egiteagatik Espainiako Auzitegi Nazionalean epaituak izaten ari diren 27 euskal herritarrei -Mitxel Sarasketa getxoztarra eta Jagoba Terrones berangoztarra daude horien artean- elkartasuna adierazi eta 33/01 auzia gaitzesteko asmoz. "Euskal Herriak Askatasuna behar du!" lelopean, 40 lagun elkartu dira Leioa eta Erandioko campusean eta 15na pertsona San Mameseko Ingeniaritza eta Enekuriko Magisteritza fakultateetan, Presoen Aldeko Taldeek (PAT) zehaztutakoaren arabera. Gasteizko unibertsitarioek, berriz, Lakuan izandako mobilizazioarekin bat egin dute. Bitartean, Madrilen, 13 ertzainek deklaratu dute bideokonferentziaz, epaiketaren gaurko saioan, fiskalak eskatuta, eta "Amnistiaren Aldeko Mugimenduaren jarduera kale erasoekin lotzen saiatu dira", Askatasunak salatu duenez. Argazkian, Leioa eta Erandioko campuseko elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun