Garapenerako lankidetzako dirulaguntzak eskatzea badago Getxon
2008ko api. 30a, 20:58
Maiatzetik aurrera egongo da zabalik, Getxoko Udalak ematen dituen garapenerako lankidetzako dirulaguntzak eskuratzeko eskabideak aurkezteko epea. "Deialdia pertsona fisiko edo juridikoei zuzenduta dago, hala nola, gobernuz kanpoko erakundeei, erlijio-kongregazioei, fundazioei eta antzekoei; betiere, egoitza edo ordezkaritza iraunkorra Bizkaiko Lurralde Historikoan badute", Begoña Ezkurra zinegotziak argitu duenez. 1992tik 4.550.137 euro zuzendu ditu proiektu solidarioak bultzatzera udal getxoztarrak, tokiko arduradunak azaldutakoaren arabera. Aurten 326.851 eurokoa da zenbatekoa. Hala ere, Sahararako Euskal Karabana dela kausa emandako 18.000 euro gehitu behar zaizkio kopuru horri. Argazkian, hainbat emakume ura hartzen Senegalen.Ohikoa denez, hiru eratako egitasmoak lagunduko dituzte: batetik, "Hegoalderako" proiektuak, "tokian tokiko gaitasunak indartzen dituzten aldaketak bultzatzeko". Horretarako, lehentasuna izango dute genero ikuspegia jasotzen duten eta, ondorioz, emakumearen egoera hobetzera bideratuta dauden egitasmoek, Ezkurrak zehaztutakoaren arabera. Ipar eta Hegoaren artean dauden desberdintasunak –hauen kausa eta ondorioetan sakonduz- azpimarratzen dituzten proiektuei dagokienez, sentsibilizazio zein garapenerako hezkuntza egitasmoak finantzatuko dira. Azkenik, larrialdiko laguntzak ere emango dituzte, hondamendi naturalen, gatazka belikoen edo bestelako arazoen ondorioz sor daitezkeen krisi-egoerak arintzeko. Batez ere, lehen mailako beharrizanak asetzera zuzenduta daude (Europa ekialdeko umeak hartzeko proiektuak, egoera kronikoak…) horiek. Hirugarren titulu honi dagokionez, eskabideak aurkezteko epea abenduaren 1era arte zabalik egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun