Artisautza azokarekin batera Oskorri Banda Band ikuskizuna izango da larunbatean Larrabasterran
2008ko api. 30a, 23:18
Artisautza azokaz gain, Oskorri Banda Band izeneko kontzertuaz gozatzeko aukera izango dute larunbat honetan, maiatzak 3, Sopelara hurbiltzen diren guztiek. Bilboko Udal Musika Bandak aspaldi luzatutako erronka onartuta, Natxo de Felipe buru duen taldeak 35 urtetan sortutako abestien berrikuspenaren emaitza dugu aipatu emanaldia. Hartara, Bilboko bandaren laguntzaz, Arriaga antzokian hiru saio eskainiz ospatu zuen iaz urteurrena Oskorrik. Behin diskoa argitaratuta, proiektu hori leku guztietara eraman nahi du euskal taldeak. Oraingoan, gainera, Uribe Bazterra banda sopeloztarra izango du bidelagun Oskorrik, larunbateko kontzertuan. Saioa 20:00etan izango da, Urko kiroldegian, sarrera dohainik. Errepertorioak 16 kantu barne hartzen ditu, nolabait aro guztietakoak, zaharrenetarik berrienetara. Argazkian, Andoaingo Musika Banda Oskorrirekin entseatzen.Sopelako VIII. Artisautza Azokari dagokionez, larunbatean egongo da zabalik, Larrabasterrako Urgitxeta plazan, 11:00etatik 20:00etara arte. Aurten 40 saltoki izango dira bertan, Euskal Autonomia Erkidekoak (EAE) gehienak, udal iturriek jakinarazitakoaren arabera. Egun osoan zehar, mota ezberdinetako produktuak erosteko aukera izango dute bisitariek: bitxiak, arropa, kosmetika produktuak, koadernaketa, osagarriak, larruzko produktuak (zorroak, diru-zorroak…) lore lehorrak, oihal pinturak, jostailuak, zilargintza, zeramika, panpinak, euskal ikurrak eta irudiak edota Zornotzan egingo den Ibilaldia 2008ko materiala, hurrenez hurren. Eskuz egindako produktuez gain, bestelako jarduerak ere izango dira: 12:30ean, Simulacro taldeak “Arte-sano” kale antzezlana eskainiko du. 14:00etan txorizoa dohain dastatzeko aukera egongo da eta, 18:00etan, txokolatada Urko Mendi Taldearen eskutik. Arratsaldeko 18:30ean Simulacro taldeak bere antzezlanaren bigarren emanaldia egingo du. Azkenik, 20:00etan Oskorri eta Uribe Bazterra Musika Bandaren kontzertua izango da Urko kiroldegian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun