Getxoztar bat atxilotu dute birritan 15 egunotan sexu erasoak egin dituelakoan
L.M.C.F. 35 urteko gizonezkoa atxilotu zuten pasa den asteazkenean goizean, emakume bati sexu abusu delitu bat leporatuta. Gizonezko hori apirilaren 17an ere atxilotu zuen Ertzaintzak antzeko gertakizun batean parte hartu zuelakoan. Azken kasuari dagokionez, apirilaren 25ean emakume batek Ertzaintzaren aurrean aurkeztutako salaketa baten ondorioz atxilotu dute gizona. Herrizaingo Sailak zabaldutako biktimaren lekukotasunaren arabera, martxoaren 30eko goizaldeko laurak aldera, Getxo udalerriko kale batean aparkatuta zeukan ibilgailua jasotzera joan zen. Autoaren atea irekitzera zihoanean, atzetik gizonezko bat hurbildu zitzaion eta hainbat sexu ukituak egin zizkion. Emakumeak erreakzionatu egin zuen eta ibilgailu barruan sartu zen. Ustezko erasotzailea ateak irekitzen saiatu zen, kristalak kolpatu zituen eta ostikadak eman zizkion karrozeriari. Azkenean, kanpoko ispiluetako bat apurtu zuen. Egoera horren aurrean, salatzaileak autoa martxan jartzea lortu eta handik ihes egin zuen.
Gertakizun horren berri eduki ondoren, Polizia autonomikoak ikerketa bat hasi zuen eta pasa den asteazkenean goizean, ustezko egilea atxilotu zuten sexu abusuaren delitu batengatik eta ibilgailu batean kalte delitua egiteagatik. Horrez gain, poliziek jakin ahal izan zutenaren arabera, pertsona hori apirilaren 17an ere atxilotu zuten Getxo udalerrian antzeko gertakizunengatik. Orduan, beste emakume bati eraso zion gaueko hamarretan kaletik zihoala eta horri ere sexu ukituak egin zizkion. Inguruetan, orain atxilotutako gizonezko bera aurkitu eta atxilotu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun