Leioako campusean abian da Amnistiaren Aldeko Astea
2008ko mai. 5a, 20:53
Erandio eta Leioako campusean, 10:00etan eman diote hasiera Amnistiaren Aldeko Asteari, gosari-hamaiketako eginez. Horrez gain, Amnistiaren Aldeko Mugimenduaren azken 30 urteotako kartelen erakusketa iraunkorra jarri dute kafetegi nagusian. Bihar, berriz, egun osoan zehar, erakusketa eta azoka izango dira kafetegi nagusian. Osteguneko bazkarirako eta autobuserako txartelak bertan eskuratu ahal izango dira. Izan ere, hilaren 8an, Gasteizko campusean egingo da Amnistiaren Aldeko Astearen egun handia. Asteartean bertan “Amnistia 07-77” izenburuko bideoa proiektatuko dute, 12:00etan, ikasgelategian. Azkenik, asteazkenerako, “Amnistiaren bila” jolasa prestatu dute, Arte Ederren sarreran. Ekimen guzti horien bitartez, 33/01 auziari gaitzespena erakutsi eta Espainiako Auzitegi Nazionalean epaituak izaten ari diren 27 euskal herritarrei -Mitxel Sarasketa getxoztarra eta Jagoba Terrones berangoztarra daude horien artean- elkartasuna adierazi nahi diete Presoen Aldeko Taldeek (PAT). Argazkian, gaurko jardunaldiko irudia, Gasteizen.Apirilaren 21ean epaiketa hasi zenetik, ugarituz doaz 33/01 auziaren kontrako eta, Amnistiaren Aldeko Batzordeak, Senideak, Askatasuna edo Euskal Herriko Giza Eskubideen Behatokia erakundeetan lan egiteagatik Espainiako Auzitegi Nazionaletik igaro behar diren 27 herritarren aldeko adierazpenak. Hain zuzen ere, testuinguru horretan kokatu dute Amnistiaren Aldeko Astea Presoen Aldeko Taldeek. "Mugimenduaren aurkako kriminalizazioa bilatzeko saiakeran dabiltzan honetan, unibertsitateetako Presoen Aldeko Taldeok (PAT) amnistiaren aldeko eta errepresioaren aurkako borrokaren zilegitasuna aldarrikatzera gatoz", adierazi dutenez. "Auzipetu dutena eta epaitu nahi dutena Estatuen biolentzia eta errepresioaren salaketa eta euskal preso nahiz errepresaliatu guztiekiko elkartasuna da, Frantziako eta Espainiako Estatuak euskal gizartearen eta munduaren aurrean biluzten dituen eta beren izaera ez demokratikoa begi bistako egiten duen testigu nagusia erditik kendu nahi dutelako", gaineratu dute. Amnistiaren Aldeko Astearen egitarau osoa, Hautsi musika taldeak egindako abestia, Gasteizko Amnistia Eguneko bazkarirako zein autobusetarako txartelen inguruko informazioa, kamiseten salmenta lekuak eta abar www.pat-eh.org/amnistia08 webgunean topa daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun