Margolari Gazteen Lehiaketa egingo dute igandean Leioan
2008ko mai. 5a, 23:41
Leioako zein inguruetako 14 eta 35 urte bitarteko artistek parte hartu ahal izango dute igande honetan, maiatzak 11, tokiko Margolari Gazteen Lehiaketan. "Aurtengoa bederatzigarren edizioa izango da. Beraz, hitzordu ezaguna da artista gazteen artean, euren lanak garatu eta lehen sariak eskuratzeko aukera ematen dielako urtero", adierazi dute prentsa ohar bidez udal iturriek. Sariketa 8:00etatik 15:00etara izango da Leioako Aterpe Gazte Bulegoak antolatuta. Aurtengo edizioa berrikuntza gutxirekin dator, baina sari potoloekin nabarmendu duetenez: lehen saria 810 eurokoa izango da, bigarrena 510 eurokoa eta hirugarrenarentzat 360 euro izango dira. Hiru sailkatuek diploma bana ere jasoko dute. Bestalde sari bereziak ere izango dira: 360 euro sailkatu barik geratzen den leioaztar onenarentzat, eta beste horrenbeste saririk jaso ez duen 18 urte beherako artistarik onenarentzat. Epaimahaiaren erabakia 19:00etan emango dute ezagutzera, Aterpe Leioa Gazte Bulegoan (Jose Ramon Aketxe plaza, 11-1). Momentu horretan bertan sariak emango dira. Bestalde, aurkeztutako lanak udal lokaletan ikusgai egongo dira, oraindik zehaztu gabe dauden egunetan. Ondoren, saririk ez duten obren jabeek euren lanak berreskuratu ahal izango dituzte, aldez aurretik jasotako gordekinaren truke. "30 eguneko epearen barruan jabea obraren bila azaltzen ez bada, obra hori Aterpe Leioa Gazte Bulegoaren esku geratuko da", ohartarazi dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun