Horretaz gain adin guztietara zuzendutako ekintzak burutuko dira igandean, txikienentzat tailerrak eta poni gaineko ibilbideak, eta nagusiagoentzat baserriko lanbideen erakustaldia, eta zelan ez, nekazari produktuen erakustaldia eta dastaketa. Produktu horiek azokaren protagonista nagusia bilakatzen dira, haien artean pateak, txerrikiak, ogiak, eztia, barazkiak, landareak, txakolina, sagardoa eta gazta bezalakoak aurkitu ahal izango direla Pinuetan.
Gainera, goizeko 12etan talo eta txorizoaren dastaketa egingo da, eta euro birengatik taloaz gain edaria ere eskuratu ahal izango dute bisitariek.
Leioako Pinueta auzoak hamargarren Nekazaritza Azoka ospatuko du igande honetan, 1999tik hona egin duen bezala. Horrela, Leioa zein inguruetako baserrien produkturik onenak dastatzeko eta erosteko aukera eskainiko diete bertan bilduko diren auzokideei. Izan ere, 28 ekoizlek parte hartuko dute igandeko hitzordu gastronomikoan eta 40 saltokitan izango dira haien produktuak eskaintzen eta aurkezten. Hamargarren azokak goizeko 10etan zabalduko da eta arratsaldeko 14:00etara arte baserriko produktuak dastatu eta erosteaz gain hainbat erakusketa ikusteko aukera izango dute bisitariek. Besteak beste, baserriko abereen erakusketa eta zaldi zein idi ferraketa izango dira, trikitixaren musikaz girotuta. Argazkian, iaz Sopelan egindako nekazaritza azokako saltoki bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun