Apirilaren 14an hasi ziren Getxoko Udal Euskara Zerbitzua eta Bizarra Lepoan euskara elkartea, zentroek aurretik hitzordua eskatuta, udalerriko hainbat ikastetxeetako Lehen Hezkuntzako eskola-umeei Getxoko euskarazko toponimia ezagutzeko oinezko ibilbideak egiteko aukera eskaintzen. Ekainaren 25era arte luzatuko den egitasmoaren bitartez, "Getxo olgetan" CDan agertzen diren 8 ibilbideak eta Bizarra Lepoanek proposatutako "Euskararen ibilbidea" izenekoa eskaintzen zaizkie ikastetxeei, euskara elkarteko gidari baten laguntzaz herriko toponimia ezagutu dezaten. Orain, berriz, ibilbide horiek erdaraz egiteko eskatu dio Koldo Iturbe Kultur zinegotziari Getxoko PPk. Euskara Zerbitzua eta Bizarra Lepoanen ekimena "oso egokitzat" jotzearekin batera, ibilbideak erdaraz egiteko aukera ematea eskatu die kultur arduradunei Marisa Arrue popularren bozeramaileak, "A ereduan ikasten duten San Inazio eta Larrañazubi (Algorta) ikastetxeetako eskola-umeek ere egin ahal izan ditzaten". Argazkian, Marisa Arrue Getxoko PPko bozeramailea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun