Maiatzaren 22tik 25era egingo den Leioako Umore Azokan, 160 emanaldi baino gehiago eskainiko dituzte mundu osoko 47 antzerki taldek. Bederatzigarren edizioan parte hartuko duten Euskal Herriko 14 konpainietatik seik jaialdia aukeratu dute euren azken lanak estreinatzeko. Hain zuzen ere, O Teatro (Zero), Gaitzerdi, Hortzmuga, Malas Kompañias, Trapu Zaharra eta Organik taldeen antzezlan berriak lehengo aldiz egongo dira ikusgai Leioan. Baina horietaz gain, beste zortzi antzezlan eskainiko dituzte Euskal Herriko beste horrenbeste konpainiek: David de Bustosen "Aires de fiestas", Gaitzerdiren "Uneka", Ganso Clownen "Renato", Hortzmugaren "Consules de la calle: momento", Javier Mañonen "Mas vale, pajaro en mano, que bocao en los guevos", Zirkilikiliren "Punto je, je , je", Orekaren "Lo Jimene" eta La Bandaren "Makina". Argazkian, Bilboko Ercilla hotelean aurkeztu dute gaur Umore Azoka Jon Iñaki Zarraga Bizkaiko Foru Aldundiko kultur zuzendariak, Eneko Arruebarrena Leioako alkateak eta Ana Lopez Udal leioztarreko kultur zuzendariak.
Lau egunez antzerkiz beteko dira Leioako kaleak. Izan ere, udaletxea, Euskal Etxeen plaza, Errekalde plaza, Sabino Arana kalea, Boulevard, Jose Ramon Aketxe plaza, Kutxa Metafisikoa, institutua, Kultur Leioa, Estartetxe eta Ikea Barri plazan egongo dira emanaldiak. Aurten, gainera, Aldapan eta Elexalde errotan ere izango dira ekitaldiak. Kultur Leioan eskainiko diren obrak ikusteko, 12 euroko sarrera ordaindu beharko da. Bestalde, antzezlanez gain, bestelako jarduerak edukiko ditu Umore Azokak: Euskadiko Antzokien Sarearen batzarra, kale artisten arteko Artekale jardunaldiak, Umore Azoka Sariak eta harrera ofiziala, Espainiako Estatuko Arte Eszenikoen Azoken Koordinakundearen (COFAE) topaketak eta II. Argazki Maratoia zerrendatu ditu, gaurko prentsaurrekoan, Ana Lopez Leioako Udaleko Ana Lopez Kultur Arloko zuzendariak. Aipatu sariei dagokionez, La Pez talde leioztarrak eta Alquimia 130 gaztelarrek jasoko dituzte garaikurrak, 2007ko Umore Azokan antzeztutako "La Danza que nos pario" eta "Alma candela" obrengatik, hurrenez hurren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun