Ordura arte albo batera utzitako errealitatearen ikuspegi bat, emakumeena, aintzat hartzea izan zen azaroko jardunaldien xedea; mugikortasuna, irisgarritasuna, gune publikoetako segurtasuna, lana eta norberaren zein familiaren bizimodua bateragarri egiteko ahalegina, umeak eta adinekoak zaintzeko ardura konpartitua, ekipamenduak, ingurumena... eta lurralde honetako herritarren eguneroko bizimoduari eragiten dioten beste gai batzuen inguruan hausnarketa egiteko asmoz. Azken batean, mankomunitatea osatzen duten zazpi udalerriotako bakoitzean ahuleziak antzemateko. Hain zuzen ere, topaketa horietan diagnostikatu ziren beharrak, aldaketak edo hobekuntzak, edo aipatu gabe geratu zirenak fisikoki kokatu zituzten otsaileko saioetan.
NARO: Berdintasunerako Gunea
Oraingo ekimena, berriz, Emakundek urtero antolatzen duen NARO izeneko berdintasunerako foroarekin bat eginez deitu du Uribe Kostako Mankomunitateak. Horren xedeak erakundeak eta kolektiboak gizon-emakumeen berdintasunaren alde egiten ari diren lana biltzea, ikusaraztea eta indartzea dira. NARO 2008: Berdintasunerako V. Gunea maiatzaren 12tik 31ra egingo da.
“Uribe Kostaren etorkizuna: berdintasun eta iraunkortasunerako lurraldea” lelopean, azaroaren 9an eta 10ean burutu ziren eskualdeko emakumeen arteko topaketak. Oraingoan, berriz, jardunaldi horietan lortutako emaitzak aurkeztuko dituzte, maiatzaren 16an, aipatu udalerriko kultur etxeko ekitaldi aretoan (Aita Gotzon, 16) egingo den ekitaldia. Saioa goizez izango da, 11:00etatik 13:00etara. Bertan egongo dira azaroko hausnarketa jardunaldietan parte hartutako andrak, Uribe Kostako Mankomunitateko arduradun eta teknikariak eta Isabel Velazquez arkitektoak. "Berdintasun eta iraunkortasunerako zeharkako politikak udalerri mailan garatzearen beharraz" ohartaraztea izango da ekitaldiaren helburua, mankomunitateko iturriek adierazi dutenez. Argazkian, azaroko jardunaldietan batutako lagunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun