Oreretan dagoen San Markoseko zabortegia ixteko zegoen trabarik handienari "konponbidea" aurkitu diote Bizkaiko eta Gipuzkoako foru aldundiek. 2012an Zubietako errauskailua martxan jartzen duten arte, lau urtetan 25.000 tona zabor hartuko dituzte Igorre, Urtuella eta Jatako (Lemoiz) zabortegiek, Jose Luis Bilbao diputatu nagusi bizkaitarrak eta Markel Olano Gipuzkoakoak -EAJkoak biak- eskuak estututa gaur itxi duten hitzarmenaren arabera. Eusko Alkartasuna salbu, berehara etorri dira gainontzeko alderdi politikoen arrangurak. Besteak beste, Uribe Kosta, Txorierri eta Ipar Uribe aldeko hondakinak hartzen ditu jada zabortegi lemoiztarrak eta, Gipuzkoan gertatuko den bezala, badirudi horien etorkizuna errausketa izango dela; Zabalgarbira kasu honetan. Bizkaira ekarritako zabor tona bakoitzeko gipuzkoarrek 65 euro ordaindu beharko dituzte, indarrean dauden tasa publikoen arabera. Urtero milioi bat eurko gastua eragingo du horrek.
"Zubietako instalazioak martxan egon arte, Gipuzkoak laguntza hori behar du", Olanoren arabera. "Une horretan gure zaborra guk bakarrik kudeatzeko gai izango gara", gaineratu duenez. Bilbaok, berriz, gogorarazi du agian bizkaitar askok ez dutela erabakia gustoko izango, baina "bidezko" akordioa dela gogorarazi du, "Ermua eta Mallabia udal bizkaitarrak Gipuzkoako zabortegiak erabili dituzten hamar urteak konpentsatu egiten dituelako". Beste alde batetik, Iosu Madariaga Ingurumeneko foru diputatu bizkaitarrak baieztatu du "zabor motaren eta eraginkortasun ekonomikoaren arabera une bakoitzean zehaztuko" dutela, baina "zabor gehiena Jatako eta Igorreko zabortegietara" eta Urtuellako instalazioetara joango dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun