Etxerat, Askatasuna, Senideak, Amnistiaren Aldeko Batzordeak edo Euskal Herriko Giza Eskubideen Behatokia erakundeetan lan egiteagatik 27 euskal herritarrei egiten ari zaizkion epaiketa dela eta, hitzaldia izango da ostiral honetan, maiatzak 9, Berangoko kultur etxean. 19:30ean abiatuko den saioan, 33/01ean auziperatutako Uribe Kostako bi lagunek, Mitxel Sarasketa getxoztarrak eta Jagoba Terrones berangoztarrak, hartuko dute hitza. Hilaren 15ean, berriz, Algortako Aldai kulturgunean (Itsasgane) egingo dute solasaldia, ordu berean. Horretan, Juan Antonio Madariaga edukiko du lagun Sarasketak. Bitartean, epaiketak aurrera darrai Madrilen. Argazkian, joan den asteazkenean, Leioa eta Erandioko campusean egindako elkarretaratzea.
Atzoko saioan, "tortura, gerra zikina, espetxe politikak hildakoak, gaixo larriak... errepresioaren espresio ezberdinak" izan zituzten aipagai abokatuen lekuko gisa deklaratu zuten Martxelo Otamendik, Arantxa Lasak, Usoa Estebanek, Goreti Ormazabalek, Edurne Brouardek, Jose Camposek eta Unai Romanok. Hala ere, "epaileak deklarazioak oztopatzen" saiatu zela salatu du Askatasunak. "Martxelo Otamendi hasi eta lekukoak banan bana pasa ziren epailearen aurretik. Epailearen aldetik jarrera aldaketa bat entzun zen atzokoan, lekukoen testigantzak mozten saiatu zelarik behin baino gehiagotan. Epaiketa honetan ez direla tortura epaitzen adierazi zien epaileak", errepresioaren kontrako erakundeak azaldutakoaren arabera. Herenegun, berriz, "aholkua" eman zien fiskalak Fiskaltzarako ikaste ari diren saiora hurbildutako hainbat ikasleei: "Deskantsuan fiskala bertara hurbildu ziren ikasleengana joan eta adierazi zien, nahiz eta atestatu horietan agertzen dena akusatuek egin ez duten, honekin lortu nahi duten helburua nolabait akusatuen aurkako giroa sortzea dela. Fiskalak uste eta nahi baino gehiagok entzun zuen ordea aholkua", salatu du Askatasunak. Gaur ez da saiorik egon. Astelehenean jarraituko du epaiketan. Bitartean, 33/01eko auziperatuei elkartasuna adierazteko ekimena abiatu dute Internet bidez, "Euskal Herriak Askatasuna behar du!" lelopean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun