Alderdi Popularrak arauz besteko proposamena aurkeztu du Bizkaiko Batzar Nagusietan, Garraio Foru Sailari Getxo eta Loiuko aireportuaren arteko Bizkaiko zerbitzua jar dezala eskatuz. Marisa Arrue Getxoko PPren bozeramaileak aipatu duenez, "horrela mahai gainean jarriko dugu berriro, orain sei hilabete, udalbatza getxoztarrak aho batez onartutako mozioa". Horren bidez, Getxo, Erandio eta Leioa aireportuarekin lotuko dituen autobusa jartzea eskatu zion Aldundiari Udalak. "Hala ere, denbora guzti horretan foru arduradunek ez dute ezertxo ere egin", Arrue kexatu denez. Popularren tokiko arduradunaren arabera, Eskumaldeko 100.000 laguni emango lioke zerbitzu garraio horrek. Argazkian, hegazkin bat bidaiarien zain, Loiuko aireportuan / Hitzak Soberan.
"Bestalde, orain urtebete onartu zen Batzar Nagusietan Bizkaiko errepide bidezko garraioa berrantolatzeko plana aurkeztea eta oraindik ez dute horrelakorik egin. Hori dela eta, bertan jaso behar diren ekimenak joango gara aurkezten. Eta, dudarik gabe, Getxo, Leioa eta Erandio aireportuarekin lotzea da horietako bat", Arruerekin batera prentsaurrekoa eman duen Jesus Isasi batzarkideak azaldu duenez. Errepideetatik ibilgailuak kentzen eta lanpostuak sortzen lagunduko luke zerbitzu berriak, popularren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun