![](http://farm4.static.flickr.com/3561/3522639663_6eb56b6032_m.jpg)
Getxoko udaltzainek J.C.A. izeneko gazte bilbotarra atxilotu zuten atzo gauean, Leioan andra bati sexu-erasoa egin ziolakoan. Horretaz gain, Areetan oinezko bat eta Metro Bilbaoko zaindari bat jotzea ere leporatzen diote. Tokiko iturriek zabaldu dutenez, Udaltzaingoaren Koordinazio Zentroak 21:00etan jaso zuen eraso baten abisua. Horren arabera, motxila bat zeraman gazte batek oinezko bat eta metroko zaindari bat jo zituen, azkeneko horri betaurrekoak apurtuz eta ezkerreko begian zauri bat eraginez. Medikuek guardia bertan artatu zuten. Ondoren, Leioarantz korrika abiatu zen erasotzailea bilatzeari ekin zion Udaltzaingoak. Handik gutxira, Leioa udalerriaren ondoan, urduri xamar zegoen andre batek udaltzainak deitu zituen eta esan zien gazte batek ukipenak egin zizkiola eta korrika alde egin zuela Lamiakoko Metroko geltokirantz. Getxoko Udaltzaingoak zabaldutakoaren arabera, emakumeak emandako deskribapena iheslariaren ezaugarriekin bat zetorren. Getxoko udaltzainek gaztea aurkitu zuten Lamiakoko nasa batean etzanda. Agenteek heldu zirela ohartu zenean ihes egiten saiatu zen baina horiek harrapatu zuten eskaileretan. Nahiz eta erresistentzia handia erakutsi, harrapatu eta atxilotu zuten. Gaztea epaiaren esku utzi dute. Argazkian, maiatzaren 11n Yasmin Zamiraren erailketa salatu zuten Algortan.