Udal diru laguntzak "legearen arabera" eman daitezen eskatu du Erandioko PSE-EEk
Erandioko Udalak ematen dituen diru laguntzak "Sail bakoitzeko ordezkariaren nahierara onartzeari uztea" eta 38/2003 zenbakiko Espainiako Diru Laguntzen Lege Orokorraren arabera ematea eskatu dio gaur Erandioko PSE-EEko Udal taldeak Mikel Arieta-Araunabeña alkateari. Juan Otermin PSE-EEko bozeramaileak azaldu duenez "tokiko administrazioaren finantza-jardueraren zati garrantzitsua diru laguntzen bitartez bideratzen da, finantza-babesaren bidez, pertsonen eta erakunde publiko eta pribatuen eskaera sozial eta ekonomikoei erantzuteko". Hori dela eta gastu publikoaren zati garrantzitsua betetzen dute eta "hortaz, aurrekontu politikaren zuzentarauetara egokitu behar dira". Oterminek azpimarratu duenez, Espainiako Diru Laguntzen Lege Orokorra "derrigorrez bete beharrekoa da" eta kritikatu du Erandioko Udalak ehunaka mila euro ematea "politikarien borondatearen arabera eta ez irizpide teknikoetan oinarrituta".
Auzia konpontzeko, eta diru laguntzak publizitatea, gardentasuna, objektibotasuna, berdintasuna eta bazterkeria ezaz banatzeko edozein laguntza eman baino lehen diru laguntzen plan estrategikoa osatzea eskatu du. Plan horretan babesen bidez lortu nahi diren helburuak eta eraginak, horretarako epeak, gastuak eta finantziazio iturriak aurretik zehaztu beharko liratekeela. Argazkian, Otermin, eskuinean, aurreko udal hauteskunde kanpainan, Leioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun