Ibilgailuen Azterketa Teknikoaren (IAT) aldaketa batek hiru urtetik gorako ziklomotorrek azterketa gainditu beharra ekarri zuela gogoratu die bi gurpileko motordun jabeei Getxoko Udaltzaingoak. Azterketa gainditzeko azken eguna 2007ko abenduaren 31n izan zen. Getxoztarrei ibilgailuen azterketa egitea errazteko, IATren azterketa egiteko gune mugikorra jarri zuten apirilaren 10ean eta 11n, Itzubaltzeta / Romoko Gobela kiroldegiko lur azpiko aparkalekuan. Hiru urtetik gora izan eta IAT gainditu ez duten ziklomotor eta motozikleten jabeak salatu egingo dituzte, ibiltzeko baimena kenduko zaie eta agiri bat emango zaie 10 egunen buruan aipatu azterketa teknikoa gainditu dezaten, tokiko polizia iturriek ohartarazi dutenez.
Zarata
Horretaz gain, udaltzainek modu berezian zainduko dute ibilgailu horiek ateratzen duten zarata eta euren ihes-tutuen homologazioa. Ihes-tutua homologatuta ez duten edo baimendutakoa baino zarata gehiago ateratzen duten ziklomotor edo motozikleten jabeak salatuko dituzte, ibiltzeko baimena kenduko zaie, ez zaie motorra mugitzen utziko eta IAT egin eta gainditu beharko dute. Horretarako, aldez aurretik ihes-tutua konpondu edo aldatu egin beharko dute, homologatua ez bada.
Maiatzaren 25ra bitartean, motor eta motozikletetan kaskoa eta dokumentazioa erabiltzen den egiaztatu eta zarata aztertzeko kanpaina egingo du Getxoko Udaltzaingoak, 2008ko Euskal Autonomi Erkidegoko Bide Segurtasunerako Plan Estrategikoaren harira. Ausazkoak izango dira kontrolak herrigune osoan, eta bereziki era honetako ibilgailuak gehien dabiltzan kaleetan eta, zarata dela-eta, kexa gehien eragiten duten lekuetan egingo dituzte. "Udaltzainek kaskoa derrigorrez erabiltzera derrigortuko dute, istripuetan segurtasuna bermatzeko ezinbesteko elementua baita. Iibilgailuen ganeko dokumentazioa, gidatzeko baimen eta lizentziak zuzenak diren, eta zarata eta Ibilgailuen Azterketa Teknikoa (IAT) ere kontrolatuko dute", udal iturriek zehaztu dutenez. Horiek guztiak zaintzen ez dituztenak salaketa jazo eta gidabaimena galtzeko arriskuan izango dira. Bestalde, Leioan ere abiatu dute kanpaina, Eusko Jaurlaritzako Herrizaingo Sailak jakinarazitakoaren arabera. Argazkian, Ertzaintzako errepide kontrol bat artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun