Plentzian egingo ditu 6 eta 12 urte bitartekoentzako aurtengo euskarazko udalekuak Mankomunitateak
Uribe Kostako Mankomunitateko Euskara Zerbitzuak euskarazko udalekuak antolatu ditu, 6 eta 12 urte bitarteko haurrentzat. Aurten Plentziako eskolan egingo dituzte, 10:00etatik 18:00etara, uztailaren 7tik 24era bitartean. Leku kopurua mugatua da (50 neska-mutil) eta izena emateko epea maiatzaren 16tik 27ra (biak barne). "Diren lekuak baino ume gehiagok izena ematen badute, jendaurreko zozketa egingo da, eta horretarako eguna eta lekua Mankomunitatearen web orrian (www.uribekosta.org) jakinaraziko dira", tokiko iturriek adiereazi dutenez. Udalekuen prezioa 120 euroko da, 85 eurokoa familia ugarituen kasuan eta 20 eurokoa Oinarrizko Errenta jasotzen dutenentzat. Informazioa eskatu eta matrikula egiteko Uribe Kostako Zerbitzu Mankomunitateko Euskara Zerbitzua jo beharko dute interesatuek, 946 762 674 telefono zenbakira deituz. Bestalde, dagoeneko abian da Lemoiz, Urduliz, Plentzia, Gorliz eta Sopelan, Euskaraz Olgetan ekimena, umeak eskolatik kanpo ere euskaraz jolas dezatela sustatzeko. Argazkian, haurrentzako puzgarriak Urdulizen.
Joan den astean eman zitzaien hasiera 1 eta 10 urte bitarteko umeei zuzendutako Euskaraz Olgetan lelopeko jarduerei. Urtero bezala, ordutegi eta leku ezberdinetan egingo dira udalerrien arabera: Lemoizen astelehenero 17:00etatik 19:00tara, Urizarreko eskolan (euria bada pilotalekuan); Urdulizen asteartero 17:30etik 19:30era pilotaleku berrian (euria bada kultur etxe berrian); Plentzian ostegunero izango dira 17:30etik 19:30era, Astillero plazan (euria bada udaletxeko arkupetan); Gorlizen larunbatero 12:00tatik 14:00tara Iberrebarri enparantzan (euria bada pilotalekuan); eta Sopelan igandero egingo dira ekintzak 12:00tatik 14:00etara Urgitxieta plazan (euria bada bertoko arkupetan). Horrela, astetik astera mota guztietako jarduerak egingo dira: birziklapen tailerrak, elikagaien festa, puzgarriak, Zientzaren Astea (ura), Higienearen Astea edo kale jokoak, besteak beste. Amaiera festa ekainaren 23tik 29ra bitartean ospatuko da, tokian-tokian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun