Polizia iturriek emandako datuen arabera, goizaldeko hiruak aldera lehertarazi du bonba-autoa ETAk, Legutioko (Araba) Guardia Zibilaren kuartelaren atarian, aurretik abisurik eman gabe. Ondorioz, Juan Manuel Piñuel Villalon 49 urteko guardia zibila hil da, eta kuartelean bizi ziren beste lau lagun -bi gizonezko eta bi emakumezko- zauritu dira. Atentatua egin dutenean, 40 bat lagun zeuden kuartelean. Zauritutako gizonezkoetako bat larri dago, zenbait orduz hondakinen artean harrapatuta egon ondoren. 34 eta 41 urte artean dituzte zaurituek; Gasteizko Txagorritxuko ospitalera eraman dituzte bi eta Santiago erietxera beste biak. Santiagon ingresatu dituztenak arriskutik kanpo daudela agertu dute ospitaleko iturriek. Argazkian, Eudelek egindako deialdiarekin bat eginez, elkarretaratzea egin zen Erandioko udaletxe aurrean Isaias Carrasco Arrasateko PSE-EEren zinegotzi ohiaren hilketa arbuiatzeko.
Citroen Berlinga furgoneta batean ezarri du lehergailua ETAk, polizia iturrien arabera, eta eztanda oso handia izan da. Horrenbestez, kalte materialak ere handiak izan dira: kuartelaren zati bat erori egin da, zoruan zulo handi bat egin du bonba-autoa zegoen lekuan, inguruetako etxeetako kristalak hautsi dira, eta bonba-autoaren zatiak 200 metrora agertu dira. Hiru kilometroko eremuan entzun da leherketa. Atentatuaren egileek hiru ibilgailu erabili ei dituzte; horietako bat, martxoaren 14an lapurtutako Peugeot 306 bat, Urkiolako mendatean aurkitu dutela ziurtatu dute. Agintariak Legutiora hurbiltzen hasi dira gertatutakoa bertatik bertara ezagutzeko. Pedro Berriazabal Legutioko alkateak (EA) udalbatzar berezia antolatu du gaur goizerako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun