Kantautoreak aurreko diskoetako beste konposizio batzuk grabatu ditu berriro. Grabaketa berriek balore erantsia eman diote lanari, horien bidez artistaren ahotsa azken 20 urteotan nolako bilakaera izan duen bereizi daiteke eta. Algortako saioan honako musikari hauekin jardungo da Mikel Markez (ahotsa eta gitarra): Pello Ramirez (biolontxeloa eta akordeoia) eta Joseba Loinaz (teklatuak eta ahotsa).
15 urte zituela
Mikel Markezek (Orereta, 1971) 15 urte zituela hasi zuen musika jarduera. Urtebete geroago bere lehenengo kantak idazten hasi zen. 1988ko udan hasi zen kontzertuak ematen eta, handik hiru urtera lehenengo diskoa kaleratu zuen: “...eta etorri egin zait...”. Horien ondoren "Oroitzapenak oparitzen ditut" (1993), "Zertarako mugak jarri" (1995), "Kantu erotikoak" (1997), "Dena hankaz gora" (1999), "Tribuaren hitz galduak" (1999) eta "Erabil nazazu" (2004) argitaratu zituen.
1.500 kontzertuk eta saiok baino gehiagok bermatzen dute Mikel Markezen ibilbidea. 20 urteko jardueran Silvio Rodriguezen, Mikel Laboaren, Benito Lertxundiren eta Paco Ibañezen mailako artistekin aritu da, besteak beste. Halaber, Kepa Junkerarekin, Niko Etxartekin, Alaitz eta Maiderrekin eta beste hainbat talde eta artistekin jardun da, bai zuzenean, bai diskoetan. Azkenik, kanta-idazle jardun da zenbait musikari eta talderentzat.
Euskal Herritik at, Mikel Markez Habanan (Kuba) eta Boisen (AEB) jardun zen 1994an. Urte horretan ere Parisen abestu zuen Paco IbAñezekin eta 1996an Kanariar Uharteetako kantatautore zirkuitu batean parte hartu zuen Pablo Guerrerorekin, Quintin Cabrerarekin eta Elisa Sernarekin, besteak beste. 1999an “Tribuaren hitz galduak” diskoa aurkeztu zuen Venezuelan eta bi urte geroago, bira bat egin zuen Argentinan Mikel Urdangarinekin.
Ostiral honetan, maiatzak 16, “Zure begiek” izenburuko bere azken lana aurkeztuko du Mikel Markezek, Algortako Getxo Antzokian. Diskoan bere musika jardueraren bi hamarkada bildu ditu kantautoreak. Horretarako, bere kanta ospetsuenetariko batzuen jatorrizko bertsioak masterizatu ditu eta beste konposizio batzuk berriro grabatu ditu. “Zure begiek”, Markezen kanta ezagunenetariko batek eman dio izena Elkarrek argitaratu duen bildumari. Lan horretan oreretarraren musika ekoizpenaren abesti onenak jaso dira, 1988an bere jarduera hasi zuenetik. “Zure begiek” kantarekin hasten da diskoa, harizko instrumentuen laguntzaz hobetuta. Horrezaz gain, beste zenbait kantu sartu dira, jatorrizko bertsioan eta masterizatuak. Horien artean “Zertarako mugak jarri”, “Gizartearen eraikuntza” eta “Imajinatzen zaitut” aipatu behar dira. Etziko kontzertua 20:00etatik aurrera izango da eta sarrerak salgai daude jada. Argazkian, gaur eman dute kontzertua aurkezteko prentsaurrekoa Anjel Valdes Elkar diskoetxeko arduradunak, Koldo Iturbe Kultur zinegotziak eta Mikel Markez berak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun