Leioako Behargintzak emandako datuen arabera, 2.463 pertsona pasa dira zerbitzu horretatik lanpostu baten bila, bere sorreratik hona. Horietatik %57 emakumeak izan ziren eta %43 gizonezkoak. "Datu hauek azken urteetako joera islatzen dute, hau da, Leioak bizi izan duen hazkunde positiboa. Azken hileko erroldaren arabera udalerriak 30.000 biztanle pasa ditu jada, hauetatik %5a etorkinek osatzen dutelarik. Bestalde, datu hauek autoenpleguaren aldeko apostua indartzen ari dela erakusten digute", adierazi dute Udaletik. Behargintzako erabiltzailearen profila 25 eta 44 urte bitarteko emakumearena da. Sexuen arteko ezberdintasun hori 45 urtetik gora ere nabaria da, "langabetu gehiago baitaude emakumeen artean gizonezkoen artean baino". "Dena dela, joera hau urteekin aldatzen doa, hau da, 25 urte baino gutxiago duten erabiltzaileen artean gizonak dira langabetu gehiago dituztenak", azaldu dute tokiko iturriek. Argazkian, Eneko Arruebarrena alkate leioaztarra.
Enplegu zentroak hainbat ekintza bideratzen ditu Leioan. Alde batetik, harrera zerbitzua. Bertan erabiltzaile bakoitzari elkarrizketa pertsonala egiten diote eta zerbitzu guztien berri ematen diete; gainera, lan merkatuaren inguruko informazioa ematen diote eta curriculuma euren data basera gehitzen dute. Horrez gain, Leioako Behargintzak lana bilatzeko hainbat laguntza eskaintzen ditu, besteak beste, enplegu orientaziorako programak, Espainiako Enplegu Zerbitzu Publikoaren aldetik. Programa hori 2002tik dago martxan eta gaur arte 1.601 pertsona hartu ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun