Perez Iglesias EHUko errektoregaiari ondoko idatzia eskura eman nahi zioten, IAren arabera:
Gurea da hitza! Bologna gelditu beharko duzue!
Gaur hemen bildu gara, UPVko errektoretzan, gure hitza entzuna izan dadin. Hilabeteak daramatzagu unibertsitate honen gidaritza daramazuen Iñako Perez eta enparauen inposaketa eta jazarpena jasaten. Ehunka mobilizaziotan entzunarazitako ahotsari entzungor, borraz isiltzea erabakitzen ez duzutenean. Bologna Prozesua gelditzearen alde lanean dihardugun ikasleoi egurra eta kriminalizazio basatia. Jarduera politiko oinarrizkoena oztopatuz, unibertsitateko “segurtasun” indarrak mehatxurako erabiliz, kamerak eta kolore ezberdinetako zakurrak kanpusean hedatuz. UPVko errektoretza taldearen jazarpena ikasleak epaitegietara eramateraino heldu da. Garai batean hain kritikatua zen Monteroren gobernuak egin bezala, UPV ikasleon etsai bezala proiektatzen da, hauek auziperatuz.
Zanpaketa egoera larri honen aurrean, UPVko gestioaren egoitza nagusia den honetan biltzea erabaki dugu. Gure hitza bertan entzunaraztea erabaki dugu. Errektoretza okupatu eta zuoi, gure egoeraren erantzule zuzenak zareten Iñako Perez eta errektoretza taldeko kideei mezu garbi bat helaraztera gatoz: ez gaituzue isilduko! Ez gaituzue geldituko! Gurea da hitza! Bologna gelditu beharko duzue!
Guzti honengatik, zera exigitzen dizuegu:
1.- Orokorrean unibertsitateko ikasleon aurka ematen diren jazarpen egoerak arbuiatzea, bai polizia autonomikoaren lana salatuz, baina baita segurtasun enpresena ere. Errektoretza taldeak, bi indarrok unibertsitatetik kanpo kokatzeko norabidea hartzeko konpromisoa har dezala eskatzen dizuegu.
2.- Bereziki, datorren maiatzaren 29an data jarrita duten hainbat ikasleren zitazio judizialak arbuiatzea eta kausa hauen artxibatzea eskatzea.
3.- Bi adierazpenok, gaur bertan Juan Ignacio Perez errektoreak, edo beste errektoretza taldeko kideren batek, publikoki egin ditzala.
Ikasle Abertzaleek Juan Ignacio Perez Iglesias EHUko errektoreari egotzi diote gaur Leioa eta Erandioko campusean gertatutako istiluen errua, "errektoregoko ateak itxi" dizkielako. "Ekimen mobilizatzaile, parte hartzaile eta baketsua izan nahi zuena, hots, errektoregora ehunka ikasle sartu eta Iñakori (Perez Iglesias) mezu bat helaraztea, istilu gune bilakatu dute. Honen ondorioz, errektoretzako atea bertan behera erortzeaz gain hainbat ikasle zauritu (2 ospitalizatuak) eta hiru atxilotu izan dira. Gertatutakoaren erantzukizun osoa UPVrena eta bere gidari den Juan Ignacio Perezena da, ez soilik bere zaintzapeko guarden jarrera oldarkorragatik, ez eta, polizia autonomikoaren eskuartze merkeagatik, baizik eta hiru urte luzez ikasleon hitzari muzin egin eta beronen indarrezko isilarazteak ikasleon artean eragindako egonezin eta haserreagatik", adierazi dute zabaldutako prentsa oharraren bitartez. Prentsaurreko eta manifestazioaren argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun