Etziko hauteskundeak baldintzatu nahi izatea egotzi die "erasotzaileei" EHUko errektoreak
Arratsaldez, 16:30ean emandako prentsaurrekoaren bitartez egin du, Leioa eta Erandioko campusean goizean gertatutako istiluen irakurketa, Juan Ignacio Perez Iglesias EHUko errektoreak. Azaldutakoaren arabera, Klaustroko bilera bertan behera utzi eta ordu erdi beranduago, "ehun eta hogei pertsona inguru Errektoretzako sarrerara joan eta eraikineko beheko solairuan indarrez sartu dira. Istilu bortitzak egon dira, kristalak eta hainbat unibertsitate altzari apurtu dituzte. Berrogeita hamar pertsona inguru oldar sartu dira eta pasaeran aurkitutako guztia txikitu dute. Unibertsitateak erasoari kontra egiteko segurtasun tresna erabili du baina erasoaren hasieratik Ertzaintzari parte hartzeko eskatu diot. Campusean bertan zeuden eta apenas minutu eta erdi barru gertakizunen tokira etorri eta erasotzaileak sakabanatu dituzte. Ertzaintzak hiru atxiloketa egin ditu". Hain zuzen ere, osteguneko Errektoretzarako hauteskundeekin lotu ditu istiluak Perez Iglesiasek: "gaurko gertakizunei azken egunotan pertsona zehatz batzuei egindako mehatxua eta indarkeria batzen zaizkie, batez ere ikasleei, etzi euren boto eskubideari uko egitea baita lortu nahi dena", azaldu duenez. Bihar bertan salaketa jarriko du EHUk. Klaustroko argazki gehiago ikusteko sakatu hemen.
Amaitzeko, deialdi "lasaia baino sutsua" egin die EHUko irakasle, ikasle eta langileei errektoreak; "unibertsitate osoak maiatzaren 22ko hauteskunde deialdian parte har dezala", alegia. "Botoa nahi duzuenari eman -hautagai bakarra da Perez Iglesias-, baina eman. Etzi botoa emango duen pertsona bakoitzak, boto txartela hautestontzian sartuko duen pertsona bakoitzak gaur jardun duten erasotzaileak bere lekuan jarriko ditu, baina aldi berean gainontzekoen boto eskubidea xaxatzen ariko da", gaineratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun