Ehun lagun baino gehiago igaro dira, ETAk aurreko goizaldean Areetako Abrako Erret Itsas Klubaren kontra burututako atentatuak eragindako kaltetuentzat egokitutako bulegoetatik, Getxoko Udalak emandako datuen arabera. "Atzo 85 pertsona hurbildu ziren udaletxera eta Itzubaltzeta / Romoko herritarrak artatzeko bulegora. Bi horiekin batera, gaur, udaltzainen argiketen furgoneta jarri dugu, Klub kalea eta Zugatzarte Etorbidearen artean, goizez zein arratsaldez", adierazi du tokian bertan Josu Loroño Komunikazio zinegotziak. Pertsona horiei jasandako kalteen tramiteak bideratzeko eman beharreko urratsen berri ematen diete. Atentatu gauean, inguruko auzokideei hotel batean gaua emateko aukera ere eskaini zieten, udal agintariak aipatu duenez; "baina inork ez zuen onartu, batzuek beraien senideen etxeetara joatea nahiago zutelako". Argazki gehiago ikusteko sakatu hemen.
"Astelehen goizaldeko 4etatik udal garbiketa zerbitzuaz arduratzen den CESPA enpresako 35 behargin eta 20 udal langile ibili dira garbiketa lanak egiten, hondakinak kentzen eta ateak eta lehioak ixten, arduradun baten zuzendaritzapean eta behar horietan beharrezko den makineriaren laguntzarekin. Aipatu langileek 12 etxebizitzetan egin zituzten konponketak atzo. Horiei 3 dendatan egindakoa gehiatu behar zaie. Gainera aipatu ordutik 10 udaltzain dabiltza inguruan zaintza lanak egiten eta trafikoa ordenatzen", azaldu du Loroñok.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun