Ostegun hau, maiatzak 22, hauteskunde eguna da EHUn. Unibertsitateko kideek errektorea aukeratzeko botoa emango dute, baita Klaustroko ordezkariak aukeratzeko ere. Horrez gain, administrazio eta zerbitzuetako langileek campusetako batzarretarako ordezkariak aukeratuko dituzte. Errektorea sufragio unibertsal haztatuaren bidez hautatzen da eta, beraz, unibertsitateko kide guztiak daude botoa emateko deituta. Guztira 54.701 lagun dira era honetara banatuta: 4.909 irakasle (1.813 irakasle doktore iraunkorrak eta 3.031 gainerako irakasleak), 48.076 ikasle eta 1.716 administrazio eta zerbitzuetako langile. Esan bezala, botoa haztatua da: unibertsitatearekin lotura iraunkorra duten irakasle doktoreei %51 dagokie; gainerako irakasle eta ikertzaileei %18; ikasleei %20; eta administrazio eta zerbitzuetako langileei %11.
Hautagai bakarra
Errektorerako hautagai bakarra dago, Juan Ignacio Perez Iglesias egungo errektorea, eta, beraz, hiru boto mota izango dira abstentziorako hautua egiten ez dutenentzat: alde, kontra eta boto zuria. Hautagaia errektore aldarrikatuko da baldin eta emandako boto baliodunetatik aldeko botoak kontrakoak baino gehiago badira. Aurreikuspenen arabera, Hauteskunde Batzordearen buruak 20:00ak aldera emango ditu errektorea aukeratzeko hauteskundeetako behin-behineko emaitzak Zientzia eta Teknologia Fakultateko Paraninfoan (Leioa eta Erandioko campusa) egingo duen agerraldian.
Quorum falta dela eta bertan behera utzitako Klaustroko batzarra eta istilu eta atxiloketak eman zioten bukaera atzo hasieratik aldrebestutako EHUko hauteskunde kanpainari. Tartean izan dira unibertsitate langileen ezinegona, hainbat sindikaturen kritika eta katedradun zenbaitzuen "ezetzarako" aldarria. Eta gertuago Ikasle Abertzaleen (IA), Presoen Aldeko Taldeen (PAT) eta Segi gazte erakundearen abstentzio aktiborako deia. Gauzak horrela, ez dirudi egungo errektore eta hautagai bakarra Juan Ignacio Perez Iglesias (argazkian) erraz izango duenik karguan jarraitzea. Behin baino gehiagotan adierazi gainera, ez aukeratzekotan ez dela berriro aurkeztuko. Hauteslekuak 10:00etatik 19:00etara egongo dira irekita. Irakasleek eta ikasleek kasuan kasuko ikastegian eman behar dute botoa, eta administrazio eta zerbitzuetako langileek campusetako errektoreordetzetan. Errektorea aukeratzeko botoa elektronikoa izango da (Demotek sistema) eta horrek "arindu egingo du botoak zenbatzeko lana eta behin-behineko emaitzak bizkorrago aldarrikatuko dira", EHUko iturrien arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun