Bigarren Eskuko Liburu Azoka zabaldu dute Algortan
2008ko eka. 25a, 19:27
Gaur, asteazkena, Bigarren Eskuko Liburu Azoka ireki dute Algortako Telletxe plazan hirugarren urtez, Getxoko Liburutegi Zerbitzuak antolatuta. Bertan, larunbatera arte, bisitariek hainbat gaitako liburuak erosteko aukera izango dute. Salmentan jarri diren liburu gehienak partikularrek liburutegiei emandakoak dira. Ohi bezala, liburuek prezio sinbolikoak izango dituzte, (euro batetik hasita) eta bildutako dirua lankidetza-proiektu solidario batean erabiliko da. Honako hau izango da azokaren ordutegia: 12:00etatik 14:00etara eta 17:00etatik 21:00etara. Sarrera doakoa da. Oraingo honetan, 12.000 bat liburu jarriko dira salgai, udal liburutegiei emandakoak. Horiek guztiak banan-banan aztertzen dira, liburutegien bildumari zeintzuk gehitu dakizkiokeen erabakitzeko.Udal liburu-bildumara pasatzen ez diren hainbat liburu interesgarriak gerta daitezke publikoarentzat eta, hori dela eta, udal liburutegiek saltzea erabaki zuten, Getxo udalerriko lau udal liburutegietako garbiketan baztertutako aleekin batera. Horrela sortu zen Bigarren Eskuko Liburu Azoka 2006an. Iaz ekitaldian 9.000 bat liburu saldu ziren bertan eta orain dela bi urte beste 9.500 bat. Hortaz, argi dago onarpen zabala duela ekimenak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun