Hilero bezala, biharko, maiatzaren azken ostiralerako, hainbat kontzentrazio deitu du
Etxerat euskal preso politikoen senideen elkarteak Euskal Herri osoan. Uribe Kostan eta Erandion zortzi hitzordu izango dira: 19:30ean, Armintzan, bus geltokiaren aurrean; 20:00etan, berriz, Erandion, metro aurrean; Leioan, Boulevardean; Itzubaltzeta / Romon, Xake plazan; Algortan, Telletxe plazan; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Elkarretaratzearen ondoren, taloak egingo dituzte Leioako Kurkudi tabernan. Hain zuzen ere, Algortan harreta berezia jarriko diote, Espainiako Auzitegi Nazionalean, Etxerat, Askatasuna, Senideak, Amnistiaren Aldeko Batzordeak edo Euskal Herriko Giza Eskubideen Behatokia erakundeetan lan egiteagatik 27 euskal herritarrei -Mitxel Sarasketa getxoztarra eta Jagoba Terrones berangoztarra daude horien artean- egiten ari zaizkion epaiketa. Gaueko 10etan, berriz, "H3 - The film of the H-Block Struggle" filma egongo da ikusgai jatorrizko bertsioan euskarazko azpitituluekin, Portu Zaharrean. Izan ere, 33/01 auziaren harira,
zinemaldia antolatu du Getxoko Txorimalo gaztetxeak. Argazkian, apirilaren 24an, hainbat lagun elkartu ziren Getxoko udaletxe aurrean, osoko bilkura hasi baino ordu erdi lehenago.
Bitartean, Urko Labeaga preso politiko sopeloztarrak Topaseko (Salamanca, Espainia) espetxean japonieratik euskaratu zuen “Eskularruak erostera” liburuaren inguruan, irratsaioa egin dute Hala Bedi irratian Jordi Zebrak eta presoaren lagun Gorka Lazkanok. Uribe Kostako Amnistiaren Aldeko Mugimenduak
Etengabe bitakoraren bitartez azaldu duenez, "elkarrizketa ere egin nahi izan zioten Urkori, zuzenean grabatu. Baina horrela egin ezinean, idatziz egin zioten elkarrizketa". Irratsaioa
interneten entzungai jarri dute, eta bertan istorio horren gorabeherak eta Labeagari egindako elkarrizketa entzun daitezke. Elkarrizketan sopeloztarrak liburuaren itzulpenaren, kartzelaren eta hainbat bizipenen gaineko kontuak azaltzen ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun