Duela hilabete batzuk jakin zuen Ertzaintzak, hainbat adingaberi lapurreta egin zietela Areetako Txurruka pasealekuan. "Kasu batzuetan gazteak ez ziren salaketa jartzen ausartzen. Hala ere, 16 eta 18 urte bitarteko lagun talde batek lapurreta egin zietela salatu zuten biktimetako bik", Eusko Jaurlaritzako Herrizaingo Sailak azaldutakoaren arabera. Lapurretako bat apirilaren 19an izan zen. Hiru gazte zenbait adingaberengana gerturatu ziren Evaristo Txurruka kalean. Dirua eskatu ostean, gazteetako batek adingabeetako bati jo zion diru-zorroa lapurtzeko. Halaber, apirilaren 30ean antzerako lapurreta bat egin zuten toki berean. Gazteak bere zilkomotorra hartzen ari zen adingabe batengana gerturatu ziren eta dirua ematen ez bazien eraso egingo ziotela esan zioten. Ertzaintzak ikerketa abiatu zuen eta ustezko lapurretako bat identifikatu zuen, 16 urteko adingabea, alegia.
Atzo polizia egoitzara joateko deitu zuten eta bi lapurreta egotzi zizkioten. Deklaratu zuenean, bere gurasoen babespean utzi zuten aske eta agintaritza judizialak deitzen duenean epaitegira joan beharko du. Azken hilabeteetan egindako beste lapurretetan parte hartu ote duen ikertzen eta taldeko beste kideak identifikatzeko lanetan ari da Euskal Autonomia Erkidegoko polizia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun