Bertso-pilota jaialdiak hartuko du bihar Algortako Txiki eta Otaegiko frontoia

Algortako Txiki eta Otaegi plazako frontoian jokatuko da bihar, larunbata, Getxo Euskal Pilotak antolatutako Bertso-Pilota Jaialdia. 19:00etatik aurrera, Gandiaga II. eta Elorriaga M. Etxebarria eta Martin II.aren aurka arituko dira, Arrate Illaro Ipar Uribeko txapeldunaren eta Peru Vidalen bertsoen doinupean, nork bere pilotari bikotearen alde egingo duena. Gipuzkoan arraroa ez den ikuskizun hori 2003an ALBEk ekarri zuen lehen aldiz Uribe Kostara, Getxoko V. Euskara Jardunaldiak aitzakiatzat hartuta. Urte horretan eta handik geroztik izandako harrera onak Getxo Euskal Pilota taldea konbentzitu zuen horrelako jaialdiei segida emateko. Algortako Bertsolari Eskolak bere garaian ikuskizuna iragartzeko erabili zuen argudioari jarraikiz, "bertsolaritzak ez du lotura zuzenik pilotarekin, ezta bertsozaleek pilotazaleekin ere, baina ekitaldi bitxi bezain bakan honetan alor biak uztartzen dira oso era egokian. Izan ere, pilota partida bat bertsoz janzteak bikoiztu egiten du erakargarritasun efektua". Argazkian, Arrate Illaro bertsolaria.