Larrialdi plana martxan jarri du Getxoko Udalak
Getxoko Udalak Udal emergentzia plana aktibatu du gaur goizean goiz, eta horren ondorioz, erabilgarri diren baliabide guztiak erabili ditu Gobela errekaren ur gainezkari aurre egiteko, udalerriko zenbait gune kaltetu baitu. Getxoko udaltzainak, Gurutze Gorriaren, DYA elkartearen eta Babesgo Zibilaren kideak eta baita zerbitzu teknikoen eta udal esleipendunen langileak ere, Gobela errekak aipaturiko gunetan eragin dituen egoerei aurre egiten egon dira une oro. Bestalde, Udal zerbitzuek berrogei eta hamar auzokide inguru haien etxebizitzetatik atera dituzte, eta Bihotz Sakratuko Udal Erresidentziara eraman dituzte.
Baliabideen artean, besteak beste, txalupa pneumatikoak, garabiak eta lur orotako ibilgailuak erabili dira kalteturik gelditu den tokiko egoiliarrak artatu ahal izateko. Kalte handiena jasan duten guneak izan dira, batez ere, Aldapa, Zubilleta, Fadura, Neguriko behekaldea Gernika parketik gertu (Akazia eta Elkano kaleak eta inguruak) eta Larrañazubi.
Gobela errekak izan dituen ur gainezka hauek behe solairuko etxebizitzak, merkataritza-lokalak eta garajeak kaltetu dituzte.
Berango, Fadura eta Negurin Gobela ibaia bere ubidetik gainezka egin eta uholdeak eragin ditu, gau osoan euri zaparrada jaso ostean. Erandion ere eragin handia izan du euriak. Getxoko Babes Zibilak eta Ertzaintzak 50 bat lagun erreskatatu edota lekuz aldatu behar izan dituzte udalerrian zehar, eta horiekin batera, udaltzaingoek eta DYAko kideak ari dira lanean alerta nagusiko egoeran. Dozenaka dira kaltetutako parking, lonja eta dendak eta oraindik okerrena heltzeko dago, arratsaldeko 15:00ak arte marea igo baino ez baitu egingo. Leioako Avanzadako tunelak itxi egin behar izan dituzte ura metro bateko alturara heldu baita. Itzubaltzeta / Romoko gazteek, berriz, goizean lantaldeak osatu dituzte Itzubaltzeta gaztetxea egur xaflaz eta area zakuz babesteko. Metro zerbitzua geldituta dago San Inaziotik aurrera. Eusko jaurlaritzak Larrialdi Mahaia bildu du egoerari aurre egiteko asmoz. Argazkian, emakume bat urak bere autoan eragindako kalteak ikuskatzen Algortako Makaleta Etorbidean. Argazki gehiago ikusteko, sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun