Larunbat gauean hasi ziren eta igandean zehar etenik gabe jarraitu zuten eurite handiek Sopelan ere kalte handiak egin dituzte, Larrabasterrako auzoan batik bat, tokiko iturriek gaur jakitera eman dutenez. "Igande goizaldeko hiruretatik aurrera, udaltzaingoa alerta egoeran egon zen, zonaldeko Ertzaintzaren arduradunekin elkarlanean. Gainera, herriko azpiegitura eta ur sarearen mantenu taldeak larrialdiko konponketa bat egin behar izan zuen, lubizi batek ur-hodi bat kaltetu zuen eta", azaldu dute. Kalteen eta gertakari anitzen zenbaketa zehatza egin zain, Urko kiroldegira doan bidean, Arabeta kalean, lubizia izan zela eta kirol azpiegiturak erabat ureztatu zirela nabarmendu dute udal arduradunek. Argaluza kalean ere lurjausiak gertatu ziren, baita Loiola Ander Deunako inguruetan ere, Lemotza ibiaiaren ondoan; horrek gainezka egin baitzuen Errekagane inguruan, hodi-biltzailea eta haitzak kaltetuz. Fraidemendin ere lubiziak gertatu ziren, uren banaketa sare nagusiaren ondoan, baita Saituko ibaian ere, kiroldegiaren ondoan. Gainera, hainbat etxaldetako garajeak, industriguneko pabilioiak eta udaletxeko lehen solairuko artxibo gela urez bete ziren. Argazkian, Urko kiroldegiko aretoetako bat urez gainezka.
Ura bideratzeko kutxatilek ere hainbat gunetan gainezka egin zuten, eta hainbat paper ontzi, trafiko seinale eta zenbait zuhaitz hondatu dira. Hondartzako gunean ere kalteak egin zituzten euriteek. Hemen garbiketa lanak beharrezkoak izango dira, eta urak itsasora eraman zuen hondarra bere lekura eramateko lanak egingo dira. Kalteak izan dituztenek erreklamazioak 946 611 800 telefono zenbakian egin ditzakete, Aseguru Etxeen Konpentsazio Batzordean (faxez 946 611 801 telefono zenbakian, edota Bilboko Heros kaleko 3. zenbakian bulegoan). Baita norberak bere aseguru etxearen bitartez ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun