Zinegotziak esan duenez “era honetako ekimen bat abiatu duen udal bakarra gara eta bultzatu egin dugu kaltetutako pertsonak normaltasunera ekartzeko".
Halaber, Loroñok aipatu du uholdeek kaltetu dituzten 45 garajeetatik atzo dagoeneko 3 oso osorik garbitu zituztela, eta beste 23tan lanean zihardutela, gainontzeko 19ak hurrengo orduetan geratuko liratekeela prest. Argindarraren hornidurari dagokionez, Akazia kalea eta Gernikako parkearen aldean atzo arratsaldean berrezarri zuten argia etxeetan. Makaletako etorbidean laster egongo zela agindu zuen zinegotziak.
Fadurako kiroldegia garbitzeko lanek aurrera darraite eta hauetan 70 lagunetik gora dabiltza. Itzubaltzeta / Romoko Gizarte Zerbitzuetako bulegoak ere zabalik dira.
Zinegotzi getxoztarrak atzo iluntzean azaldu zuenez, “Udaletxeak ahalegin handia egin du Udalenak ez diren garbiketa taldeak kontratatzeko kaltetutako auzokideei beren etxeak garbitzeko zerbitzu berezi bat eskaini aldera, eta udalerrian ahalik eta lasterren normaltasunera itzuli aldera”.
200 lagunetik gora ari dira lanean Getxo udalerria bere onera ekartzeko
2008ko eka. 3a, 20:49
200 lagun inguru eta 75 ibilgailuk osatzen dute Getxoko Udalak igandean udalerrian hondamendia eragin zuten uholdeen ondorioei aurre egiteko abiatutako dispositiboak. Guztira 32 lagun dira udal egoitzetara eta herriko hoteletara eraman dituztenak, nahiz eta Udalak auzokide komunitateekin harremanetan jarri den zerrenda hori handitu behar den jakiteko. Era berean, 180 lagun ziren ja atzo arratsaldean OAC-HABetara, Aiboako Udaltzaingokora eta Udaletxera bertara jo dutenak dirulaguntzen gaineko informazio eske. Komunikazio, Herritarren Arretarako eta Babes Zibileko zinegotziak, Josu Loroñok eskainitako datuen arabera, guztira 18 izan dira garbitu dituzten etxebizitzak udal operazioaren barruan eta beste 4 amaitzeke daude, gaur bertan amaituko dituztela garbiketa lanak. 6 saltokik eskatu dute zerbitzu hori eta 3 dagoeneko garbitu dituzte. Argazkian, Zubilleta auzoko bi lagun denda batetik zarama ateratzen. Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun