Bestalde, berak eta bere Gobernu taldeak Gobela ibaia kanalizatzeko "asmoa badutela" adierazi du Landak. Horretarako, Eusko Jaurlaritzako arduradunekin hitzartu dute bilera, "ia guztiz idatzita dagoen" Gobela ibaia bideratzeko egitasmoa aurkezteko helburuarekin. “Udalak egitasmoari bultzada ematea eskatuko du, bideratze hori lehenbait lehen egia izan dadin”, gaineratu du alkateak.
Era berean, atzo Aldunditik aipatu bezala, udal agintariak esan du "ez larunbatean, ezta igandean (ekainaren 1eko goizaldean) ere", ez zutela alerta abisurik jaso. Larunbatean, 19:16an, “beste batzuetan jaso den eguraldi iragarpenaren antzeko bat" heldu zitzaiela azaldu du. "Eta orain arte ez da inoiz uholderik izan”, Landak zehaztu duenez. “Igandean jasotako iragarpenek ere ez zuten horren arriskurik iragartzen”, alkatearen hitzetan. Informazio soil horrekin egin behar izan zion aurre larunbat eta igande arteko gauari eta “hortaz, egoeraren gaineko geure azterketa propioak aintzat hartuta, eta egoera hartzen ari zen itxura txarra ikusita, goizaldeko 3ak aldera Larrialdietarako Udal Plangintzan aurreikusita dagoen larrialdi protokoloa indarrean jarri genuen”.
Balantzea
Uholdeek utzitako kalteen balantzeari dagokionez, 104 atari, 56 beheko eta etxebizitza gertatu dira kaltetuak. Baita 31 garaje eta guztira 1.003 aparkaleku ere. Zapuztutako ibilgailuen kopurua, berriz, 300 eta 500 artekoa da. Bestalde, 17 saltoki eta ostalaritza establezimenduetan, Getxo I institutuan, Larrañazubi ikastetxean eta DYAren hirugarren adinekoentzako eguneko zentroan kalteak izan dira. Ondasun partikularretan izandako galerak 4 eta 5 milioi euro artekoak dira, Joseba Arregi Hirigintza zinegotziaren arabera.
Udal ekintzei dagokienez, 38 etxebizitza, 31 garaje, 7 saltoki eta ostalaritza establezimendu, aipatutako bi irakaskuntza zentro eta eguneko zentroan lan egin dute. Bestalde, Udaltzainek Itzubaltzeta / Romo eta Plentziako Hiria ingurutik 1.000 ibilgailu baino gehiago atera zituzten. Beste ehun bat auto Algortatik Etxezuri eta Itzubaltzeta aldera bidali zituzten. Azkenik, udal ondasunetan izandako kalteei dagokienez, Fadurako kiroldegia izan da zapuztuena eta, lehenengo aurreikuspenen arabera, galerak 6 milioi euro baino gehiagokoak izango dira.
Uholdeek kaltetutako lagunei etxeen konponketa lanak ordainduko dizkie Getxoko Udalak
2008ko eka. 4a, 20:23
Ekainaren 1ean izandako uholdeen ondorioz euren etxebizitzetan kalteak jasan dituzten bizilagunei, itzuli beharrik gabeko dirulaguntza zuzenak emango dizkie Getxoko Udalak. Imanol Landa alkateak gaur iragarri duenez (ordu eta erdi lehenago Getxoko PPk eman du prentsaurrekoa), tokiko erakundeak "asegururik ez duten auzokideen etxeak zaharberritzeko kostua bere gain hartu du; baita aseguruak konponketa osoa ordaintzen ez dutenena ere". Horiekin batera, Udalak beste neurri batzuk ere jarriko ditu indarrean, hala nola, kaltetutako etxebizitzen jabeentzat eta merkataritza lokalentzat, 2008ko zarama tasa, Ondasun Higiezinen Zerga eta ur eta estolderia tasak ordaintzeko diru laguntza zuzenak. Ibilgailua kaltetuta dutenei, berriz, 2008ko zirkulazio zerga kendu eta diru hori itzuliko zaie; Aldundiak emango duen laguntzaren osagarri. Era berean, kaltetutako pertsonak denboraldi baterako beste toki batean (hoteletan edo senideen etxeetan) egoteko izandako gastuak bere gain hartuko dituzte, aseguruek ordaintzen ez dituztenean. Laguntza horiek guztiak ondo bideratu eta gestionatzeko, kaltetuen errolda sortu du Getxoko Udalak, Aiboako Udaltzaingoaren egoitzan horretarako propio egokitutako bulegoan. Izena eman ahal izateko, auzokideek datu pertsonalak eta Aseguruen Konpentzatsio Partzuergoan aurkeztutako kalteen aitorpenaren kopia aurkeztu beharko dituzte. Argazkian, astelehen arratsaldean hainbat auzokideekin bildu zen alkatea.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun