Gobela ibai arroaren pare parean eta honen eraginpean dauden guneetan etxebizitza, industria pabiloi eta kirol ekipamendu gehiago eraiki dira azken urteotan, kalterik sortu gabe ibaiari gainezka egiteko leku murritzagoa utziz. Uholdeak hartutako guneak plano batean marraztuz, urpean geratu diren etxe, eraikin eta kaleak, bete betean daude 1999ko Ibaiak eta Ibaiertzak Babesteko Lurralde Arloko Planak grafikoetan zehazten dituen uholdeak izan ditzaketen guneetan. Etxe hauetako batzuk azken milurte honetan eraiki dira.
Uholdearen eraginpean izan diren guneetatik kanpo ere izugarri eraiki da eta lurrari, ibaira isuri aurretik, urak xurgatzeko aukera nabarmen murriztu zaio. Goian aipatutako azpiegitura lana kenduta, uholdeen arriskua prebenitzeko hobekuntzak baino, txarrera egin du egoerak azken hamarkada hauetan.
Kaltetutako herritarrak behar bezala lagundu ondoren, izandakotik ikasi eta aurrera begiratzeko unea da. Atzerapenik gabe Gobelaren arroa egokitzeko duela zenbait urte tramitatzen ari diren plana eta proiektua, gure uste apalean oro har egokiak direnak, gauzatu behar dira. Jadanik planoetan zehaztuta dauden uholdeak izan ditzaketen guneetan ez litzateke inola ere gehiago eraiki ezta urbanizatu behar. Gune hauetan dauden eraikinen egoera eta kokapena sakonki aztertu ondoren, lekualdaketa ala babes eta ziurtasun neurrien artean aukeratu beharko da kasuan kasu.
Eta azkenik, eskualdeko urak Gobelara heldu aurretik lurrak goxo har eta xurga ditzan, Uribe Kostan milaka eta milaka etxebizitza, hektarea askotako urbanizazioak eta errepideak eta kaleak kilometroka eraikitzea aurreikusten duen Bilbo Metropoliaren LZP-PTP izeneko lurralde antolaketa plana gelditzeko eta goitik behera eraldatzeko beste arrazoi garrantzitsu bat gehiago ere badaukagu.
Christian Reinicke, Getxoko ezker abertzaleko kidea
Gainezka egin du Gobela ibaiak Berangon eta Getxon. Bilbon eta Bizkaiko beste eskualde batzuetan ez bezala, gurean 1983ko eta 1979ko uholdeen parekoa izan da pasa den domekakoa, Gobelaren urak Itzubaltzetatik Abrara zuzen isurtzeko duela 10 urte eraiki zen ubideari esker Romo eta Areeta auzoak oraingoan aparteko kalterik izan ez duten arren. Kalteak pairatu berri dituzten herritarrak laguntza eske ari dira eta aseguru etxeen partzuergotik ezezik, administrazio publikoen aldetik ere erantzun egokia eta baikorra merezi dute. Larrialdi abisua garaiz eta ondo ez ematea larria bada ere, arazo larriena ez da hori. Arazo larriena eta sakonena da Udalak, Foru Aldundiak eta Jaurlaritzak onetsi dituztela lurralde antolaketa eta hirigintza planak eta eman dituztela etxeak eraiki eta bertan bizitzeko baimenak. Duela ehunka urte getxotarrek zerbaitengatik jarri zioten eremu horri Fadura (= Padura) izena. Baina errekak uholde garaian hedatzeko behar duen eremuan, espekulazioak eta erakundeek eraikitzeko lurrak ikusten dituzte. Administrazioen erantzukizuna argia da. Argazkian, uholdeak Algortako Getxo I institutu parean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun