Mintza Egunari hasiera emateko, Algortako Portu Zaharrean egingo diete ongi etorria berbalagunei. Ondoren hamaiketakoa egin eta kalejiran joango dira Algorta erdialderaino, bertan metroa hartu eta Itzubaltzeta / Romon bazkaria eta Patxi Perezen erromeriaz gozatzeko. Euskal Herri osoko 46 udalerritan 2.500 lagun inguruk parte hartzen dute, astean behin, kalean, parkean, tabernan edo frontoian, giro lasai eta atseginean, euskara dakitenak eta ikasi berriak euskaraz berba egiteko elkartzea helburu duen egitasmoan. Getxo udalerrian berriz, zortzi urte dira, Bizarra Lepoan euskara elkarteak berbalagun egitasmoari ekin zionetik. Egizuk 2005ean hartu zuen lekukoa eta, ordutik hona, bi urtetan behin sinatzen dute hitzarmena Udalarekin.
Egitaraua:
11:00 Ongietorria Algortako Portu Zaharreko orubean: bertsolariak, txalapartariak, suziriak eta Getxoko berbalagunek 350 lagunentzat prestatutako hamaiketakoa.
11:30 Ibilaldi gidatua Xabi Payaren eskutik: Portu Zaharra eta Usategi.
12:30 Kalejira koloretsua eta musikala (Basagoiti Etorbidea, Kasino plaza eta Telletxe plaza)
14:30 Herri bazkaria Santa Eugenia plazan (Itzubaltzeta / Romo)
16:00 Sari banaketa: bazkalosteko giroa aprobetxatuko dute mintzapraktika egitasmoen bilakaeran parte hartze eta garrantzia berezia izan duten zenbait erakunde eta laguni eskerrak eman eta opari xume bat ere egiteko.
16:30 Patxi Perezen taldeak gidatutako erromeria.
Mintza Eguneko bazkarirako txartelik badago oraindik
2008ko eka. 4a, 21:37
Ekaitzaren 14an ospatuko da Algorta eta Itzubaltzeta / Romon Mintza Egunaren hirugarren edizioa. Hain zuzen ere, egun horretan, Santa Eugenia plazako karpapean izango den bazakarirako txartelik oraindik badagoela jakinarazi du Egizu Getxo Euskaldun! elkarteak. Izena eman nahi dutenek ostiral eguerdira arte edukiko dute horretarako aukera. Joateko asmoa dutenek 18 euro sartu beharko dituzte Euskadiko Kutxako ondoko kontu zenbakian, izen-abizenak emanda: 3035 0067 66 0670062588. Ingresoa egin eta gero Egizura deitu beharko da abisatzeko. Bestalde, "hamaiketakora etortzeko ez da izenik eman behar eta denok gonbidatuta zaudete, nahi eta ahal duenak tortila ekar dezala, edariak gure kontu", Egizukoek adierazi dutenez. Bitartean, ekainaren 21 eta 22rako bizikleta asteburua eta ipuin laburren lehiaketa (pdf) ere antolatu ditu elkarteak. Argazkian, 2007ko Mintza Eguna Donostian.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun