Larunbatean, ekainak 7, Bizkaiko Erraldoien Egunaren bigarren edizioa hartuko du Areetak. Hori dela eta, bost erraldoi-konpartsa eta beste horrenbeste gaitero-talde batuko dira bertan. Ekitaldia Bizkaiko Gaiteroek eta Ondalan eta Getxoko Erraldoien Konpartsek antolatuta dago, Getxoko Kultur Etxearen laguntzaz. Aurten Bermeoren lekukoa hartu dute bertokoek jarduera horren antolakuntzan. Ekimenak honako helburu hauek ditu: batetik, Bizkaiko erraldoien konpartsak ezagutzera ematea eta, bestetik, herri-tradizioa bultzatzea. Ospakizun hori dela eta, konpartsek kalejira egingo dute Bizkaia Zubiko plazatik Xake plazaraino. Honako talde hauek izango dira Bizkaiko Erraldoien Egunean: Ondalan (Deustu), Mendialde (Santurtzi), Basurtoko eta Bermeoko erraldoien konpartsak eta Agurra Dantza Taldearen erraldoien konpartsa. Desfileko musikaz Bizkaiko Gaiteroak arduratuko dira. Argazkian, erraldoiak Bizkaiko Zubi azpian dantzan.
Kalejira 19:00etan abiatuko da Bizkaia Zubiko plazatik eta Kale Nagusia zeharkatuko du Andres Larrazabal kaleraino. Bertatik Paulino Mendibil kalera igaroko dira, Eskoletako plazaraino. Jarraian, desfilea Kale Nagusira itzuliko da eta Ibaiondo kaletik igaroko da, Xake plazan amaituko dela. Bertan saioa eskainiko dute konpartsa guztiek; baita jende aurrean aurkezpena egin ere. Besteak beste, taldeen historiaa, erraldoiek irudikatzen dituzten pertsonaiak eta horien jantzien berri emango dute. Azkenik, gaztetxoenek ere jaiaz gozatu ahal izango dute, haurrentzako eskulan-tailerrak egongo baitira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun