“Mundo Katxibatxe” lelopean, izen bera daukan elkarte bilbotarraren erakusketa jarri dute Sopelako udaletxeko erakusgelan, ekainaren 20ra arte. Erabilitako tresna eta gauzak bererabiltzearen kultura zabaltzea dute helburu nagusia. “Gure gizartean gauzak erabili eta botatzea da ohikoena. Baina, bazterrean uzten ditugun gauza hauetako asko oraindik bizirik daude, erabili daitezke”, dio Alazne Ezpeleta aipatu taldeko kideak. Ezpeleta bera eta Ana Perez, Amaia Larrinaga, Nerea Bolivar eta Jone Gonzalez dira erakusketaren arduradunak. Bost artistok (denak Arte Ederretan lizentziatuak) ura hartu dute gaitzat, baztertutako objektuei “sormenezko erabilera” emateko. Bost instalazio sortu dituzte, elkarren artean lotura dutenak. Erakusketak hainbat teknika nahasten ditu, pintura, eskultura, grabatuak eta marrazkiak, tarteko.
“Gure materialak bezala, ura ere berriro erabiltzen da: itsasoko ura hodeietara doa, eta lurrera dator berriro euri bilakatuta, bizirik gaudenok erabiltzeko, edateko. Objektuei ere berrerabilpenaren ziklo bera eman nahi diegu”, Perezen hitzetan. Osto lehorrez eginiko euritakoa, loreontzietatik ur eske jaiotzen diren panpinak, hodeiak, arrainak, bizikletan doazen insektuak eta beste hainbat bitxikeria ikus daiteke erakusketan. “Gauzak bere ohiko testuingurutik ateratzen ditugu, beste leku batzuetan jartzeko”, azaldu du Ezpeletak. Bost instalazioak materiale eta esanahi ezberdinekin jolasean dabiltza. “Zergatik ez du goruntz euria egiten? Bustitzen zaren euritako bat... ikusleari askatasuna ematen diogu gauzekin jolas dadin”, azaldu Gonzalezek. Erakusketaren bitartez, jendeak gogoeta egin dezan nahi du Mundo Katxibatxek, “zaborretara botatzen dugun guztia erabil daitekeela konturatu daitezela alegia”. Erakusketaz gain, tailerrak ere antolatzen dituzte berrerabilpenaren gaia haur, gazte eta helduei iritsi arazteko, sormenaren bitartez. “Ideiari buelta ematen diogu: 'material hauek ditut' esalditik abiatuta, objektuokin zer egin dezakegun galdetzen diogu geure buruari”, nabarmendu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun