Despedida: ekainaren 13an, Durangoko Plateruenean
“Ez dok hamairu” erantzun ei zion San Martinek deabruari, honek arima eroan ez zekion; malefizioa hausteko ideia horrek berak eman zion izena euskal kantagintza berriari ekin zion talde dagoeneko mitikoari. Patuari ziria sartzeko asmoa da gurea ere, baina zera diogu: “hamairuan donk!”; ekainaren 13an, hain zuzen ere.
Izan badu 13 zenbakiak halako karga ezkor bat, are ezkorragoa gaur lez asteartea bada, edo datorren ekainekoa lez ostirala denean. Ez gaitu gu horrek atzera botako. Orain dela urte eta erdi ekin genion Bertso berriak eta lagun zaharrak emanaldiari, Korrika Kulturalarekin batera, eta ordurako bagenekien epe baterako proiektua zela gurea. Erabakia genuen eufemismoak inertzia deitzen dion patu mota horrek harrapatu gintzan baino lehenago urkatu egin behar genuela denboraren arbolan, betirako dilindan, eta soka nahikoa luzatu denean halaxe egitea erabaki dugu. Datorren San Antonio egunean, ekainaren 13an, egingo dugu azkenengo saioa Durangoko Plateruenean.
Zenbakiekin jarraituz, hirurogeita laugarren emanaldia izango da azken hori, eta aurrejubilatzeko garaia dela pentsatu dugu: geure gotorlekuetara itzultzeko unea da, erdi libre izateko amets berriak elikatzera garagardotan. Izan ere, behinola amestu genuena bete egin da oraingoan, bete baino gehiago: 64 euskal herri jator, goxo eta putatan izan gara kantuan, tokian tokiko 100dik gora gutar izan ditugu gonbidatu (eta anfitrioi, aldi berean), 10.000 gutar baino gehiago batu ditugu,…
Zenbakiek badute, bai, euren magia. Askoz gehiago oraindik egun argi eta gau ilunetako oroitzapenekin biderkatzen badira. Baina nostalgiak jotako idioten zerrendan zenbaki bat gehiago izan aurretik, gutarrak bildu eta despeditzeko sasoia da.
Hamairuan donk!
Igor Elortza
Fredi, Xabi eta Itxaso Payarekin batera 2007ko martxoaren 22an Astrabuduan emandako saioaren zatia
Igor Elortza, Unai Iturriaga, Josu Zabala, Aitor Rubio eta Xanpek osatutako Gu ta Gutarrak bertso musikatuen taldeak ostiral honetan emango du azken kontzertua, Durangoko Plateruena Kafe Antzokian. Haiekin batera, "hainbat gutartistek" parte hartuko dute emanaldian. Gu ta gutarrak "Bilbon Bertso berriak eta lagun zaharrak" emanaldiarekin abiatu zen, 2007ko otsailaren 1ean, Korrika Kulturalerako antolatutako lana dela medio. Taldeak ohar baten bidez jakinarazi du ikuskizuna ez duela aurrera jarraituko: "bertsoak, musikaren gainean 64 euskal herritan barrena egindako bidaia emankor honetan poesia, antzerkia, dantza eta irudiak izan ditu bidaide", dio oharrean Gu ta Gutarrak taldeak. Kontzertu horietan ehun bat artista gonbidatu izan dituzte haiekin batera oholtzan eta 10.000 bat ikusle bildu dituzte. Koplatan ere iragarri dute azken agurra: "hauxe da despedidea / despedida alegrea / jai giroan elkartzeko / gu eta gutar jendea". Argazkian, Gu ta Gutarren taldekideak Paya Ruiztar anai-arrebekin / Gu ta Gutarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun