Arratsaldean, 18:30etik 19:30era, izango dira ELAk eta CIMek Metro Bilbaon deitutako lanuzteak.
Autobusetako lanuzteek Transportes Colectivos SA (TCSA) enpresaren jardunpeko lineetan dute eragina, eta Uribe Kosta eta Erandiori dagokionez, Areeta, Getxo, Algorta eta Altzagatik Leioa eta Erandioko campuserako autobusik ez da egon, 7:30etik 9:30era eta arratsaldean ez dira egongo 18:20etik 20:00etara; gutxieneko zerbitzuak kontutan hartu gabe. Bilbotik etorrita, Astrabudua zein Erandio Landatik EHUrako bidea egiten duten lineetan ere dute eragina lanuzteek. Baita Astrabuduatik Erandio Landa eta Sondikarako autobusetan ere.
LEP eta selektibitate azterketak gertu
EHUk emandako datuen arabera, 24.000 lagun inguruk egingo dituzte administrazio eta zerbitzuetako langile izateko azterketak. Gauzak horrela, igande honetatik aurrera, 8:30etik 9:30era, Etxebarri eta Portugalete arteko trenen maiztasuna bikoiztuko duela iragarri du Metro Bilbaok; astelehenetik aurrera Ansion jaitsita Barakaldoko BECera hurbildu behar direnentzako. Asteazkenetik ostiralera, berriz, selektibitateko azterketak izango dituzte ehunaka ikaslek eta, oraindik, ikusteke dago autobus eta metroko lanuzteek zer nolako eragina edukiko duten. Bizkaibus da hainbat tokitatik Leioa eta Erandioko campusera heltzeko garraio publiko bakarra.
Lan hitzarmeneko negoziazioetan presio ekimen gisa ELAk eta CIMek gaur hasi eta astelehenero eta ostiralero Metro Bilbaon deitutako lanuzteak makina bat langilek babestu badituzte ere, geldialdiak ez du eragin handia izan bere lehenengo jardunaldiko goizeko txandan, 7:30ak eta 8:30ak bitarteko jendetza-orduak, alegia. Alde batetik, ezarritako gutxieneko zerbitzuak %40koak izatea eta beste aldetik, hainbat bidariarik aurretik beste garraiobide alternatibo bilatu izana, batez ere autoa, edo bere bidaia aurreratu izana izan dira Uribe Kostan eta Erandion lanuzteak mugitzeko arazorik sortu ez izanaren arrazoiak. Era berean, beste sindikatuek zakar aritu ziren ELA eta CIMen ekimenaren aurrean. Bestalde, gaur TCSAko Bizkaibuseko gidariek ere lanuzteari ekin diote eta, azkenik, besteak beste, ilara luzeak izan dira Avanzadako eta Arteako gasolindegietan. Izan ere, gaur abiatu den garraiolarien greba dela-eta gasolinaren hornikuntza eza sor daitekeelakoan hainbat gidarik depositoa bete dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun