Barrikako elizako dorrean jarri den erloju elektroniko berria (argazkian) datorren ekainaren 24an inauguratuko da. Eguerdiko 11:30ean egingo da ekitaldia, San Juan festak direla eta, herriko jaietan. Bodet Frantziako etxeak eginiko erloju elektronikoa da, erabat automatikoa eta satelite bidez zuzendua, ordua zehaztasun osoz ematen duena, antena bati esker, tokiko iturriek zehaztu dutenez. Ekimena Santa Ageda koruak bultzatu du, berak eskatu baitzion Udalari erloju zaharra aldatzea, zerbitzu egokia eskaintzen zuen baten truke. “Koruak berak hartu zuen bere gain erlojua erosteko finantzaketa, eliza hobetzeko urtero egiten dugun diru bilketarekin”, adierazi dute Iñaki Zarate eta Javier Peñak, Santa Ageda abesbatzako kideak biak. Hala ere, tokiko erakundeak bere kabuz egin zuen erlojuaren finantzaketa osoa. “Herriak eginiko eskaria da, eta denen mesederako izango da. Herriko erloju nagusia izango da”, esan dutenez.
Bestalde, hilaren 20an, kontsumo txikiko bonbilak (75 watiokoen antzekoak) banatuko ditu doan Energiaren Euskal Erakundeak (EEE), Barrikako udaletxeko plazan, 19:00etan. Sorta bakoitza bi bonbila, etxeko energia aurrezteari buruzko gida eta informazio-liburuxkak osatzen dute. Hori guztia eskuratzeko DNI, pasaportea, gida baimena edo DNI zenbakia agertzen den agiri ofizialen bat aurkeztu beharko da. Pertsona bakoitzak gehienez bi identifikazio aurkeztu ahal izango ditu sortak jasotzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun